- రిపోర్టుపై కేంద్ర జలశక్తి శాఖ మంత్రి సంతకం
- నేడో రేపో రాష్ట్రానికిఅందే అవకాశం
హైదరాబాద్, వెలుగు: మేడిగడ్డ బ్యారేజీలో ఏడో బ్లాక్ ఒక్కటే మళ్లీ కడితే సరిపోదా? పక్కన ఉన్న బ్లాకులనూ మళ్లీ కట్టాల్సిందేనా? అంటే అవునన్న సమాధానాలే వస్తున్నాయి. నేషనల్ డ్యామ్ సేఫ్టీ అథారిటీ (ఎన్డీఎస్ఏ) తన తుది నివేదికలో ఇదే అంశాన్ని పేర్కొన్నట్టుగా విశ్వసనీయ వర్గాల ద్వారా తెలుస్తున్నది. ఏడో బ్లాక్‌‌తో పాటు 6, 8 బ్లాకులను మళ్లీ కట్టాల్సి ఉంటుందని ఫైనల్ రిపోర్టులో ఎన్డీఎస్ఏ నిపుణుల కమిటీ సిఫార్సు చేసినట్టు తెలిసింది.
ఏడో బ్లాక్ కుంగడంతో దాని పక్కన బ్లాకులపైనా ప్రభావం పడిందని.. ఆ బ్లాకులు కూడా ఎంత వరకు పటిష్టంగా ఉంటాయన్నది చెప్పలేమని రిపోర్టులో వెల్లడించినట్టు సమాచారం. ఎన్డీఎస్ఏ తన ఫైనల్రిపోర్టును రాష్ట్ర సర్కారుకు గురువారం లేదా శుక్రవారం అందించే అవకాశాలు ఉన్నాయని తెలిసింది. ఇప్పటికే ఆ రిపోర్టుపై కేంద్ర జలశక్తి శాఖ మంత్రి సీఆర్ పాటిల్సంతకం కూడా చేశారని చెబుతున్నారు. సీఎం రేవంత్ రెడ్డి, మంత్రి ఉత్తమ్కుమార్రెడ్డి ఢిల్లీ టూర్సందర్భంగా దీనిపై కేంద్రమంత్రితో చర్చించినట్టు తెలిసింది.
అందులో భాగంగానే ఎన్డీఎస్ఏ రిపోర్టులోని కొన్ని కీలకాంశాలు చర్చకు వచ్చినట్టు సమాచారం. ఏడో బ్లాకును కూల్చడమూ కొంత సవాలుతో కూడుకున్నదేనని, బ్యారేజీ అలైన్‌‌మెంట్దెబ్బతినకుండా చూసుకోవాలని చెప్పినట్టు తెలిసింది. మేడిగడ్డ బ్యారేజీ కుంగిన చోట గ్రౌటింగ్చేసి ఎవిడెన్సులు మాయం చేసేలా చేశారని తుది నివేదికలో ఎన్డీఎస్ఏ పేర్కొన్నట్టు తెలిసింది. ఈ నేపథ్యంలోనే అక్కడి పరిస్థితులకు అనుగుణంగానే ఎలాంటి చర్యలు చేపడితే బాగుంటుందన్న విషయాలను రిపోర్టులో నిపుణుల కమిటీ చెప్పినట్టు సమాచారం.
రక్షణ చర్యలు తీసుకోకుంటే దిగువన గ్రామాలకు ముంపు ముప్పు తప్పదని హెచ్చరించినట్టు తెలిసింది. బ్యారేజీలోని మిగతా బ్లాకుల అలైన్‌‌మెంట్దెబ్బతినకుండా చేపట్టాల్సిన చర్యలను సిఫార్సు చేసినట్టు సమాచారం. ఎగువన, దిగువన 2డీ, 3డీ మోడల్స్టడీస్ చేయించి.. రక్షణ చర్యలను చేపట్టాలని పేర్కొన్నట్టు తెలిసింది.
