మెదక్ టౌన్, వెలుగు: మెదక్ ఎమ్మెల్యే పద్మా దేవేందర్ రెడ్డికి ఎన్నికల్లో సహకరించబోమని మెదక్‌‌లో బీఆర్ఎస్ పార్టీకి చెందిన సీఎం కేసీఆర్ రాజకీయ కార్యదర్శి, ఎమ్మెల్సీ శేరి సుభాష్రెడ్డి వర్గం, మైనంపల్లి రోహిత్ వర్గం తీర్మానించారు. మెదక్ పట్టణంలోని ద్వారకా గార్డెన్స్‌‌లో సమావేశమయ్యారు. హవేళీ ఘనపూర్ ఎంపీపీ శేరి నారాయణ రెడ్డి మీడియాతో మాట్లాడుతూ... కార్యకర్తల మనోభావాలు దెబ్బతీసే విధంగా అధిష్టానం మెదక్ ఎమ్మెల్యే పద్మా దేవేందర్ రెడ్డి పేరు ప్రకటించడం బాధాకరమన్నారు. మంత్రి హరీశ్రావు మెదక్ ప్రాంతాన్ని అభివృద్ధి చేస్తారనుకుంటే సిద్దిపేటను మాత్రమే అభివృద్ధి చేశారని ఆరోపించారు.
రెండు మూడు రోజుల్లోగా స్థానికంగా సర్వే చేసి కార్యకర్తలకు నచ్చిన నాయకులకు టికెట్ ఇవ్వాలని 60 ,70 వేల మెజార్టీతో గెలిపిస్తామని ధీమా వ్యక్తం చేశారు. ఈ విషయంలో కేసీఆర్, కేటీఆర్ ముద్దు... పద్మ వద్దు అనే నినాదంతో ముందుకు సాగుతామని చిన్న శంకరంపేట మండలం సర్పంచ్ రాజిరెడ్డి తెలిపారు. ఎమ్మెల్యే పద్మా దేవేందర్రెడ్డి వెయ్యి ఎకరాల భూమి సంపాదించారన్నారు. ఎమ్మెల్యే పద్మ భర్త దేవేందర్ రెడ్డి తన సొంత గ్రామం కోనాపూర్‌‌‌‌లోని సొసైటీలో రెండున్నర కోట్ల రూపాయల స్కామ్ చేశారని ఆరోపించారు. మెదక్ అభివృద్ధి విషయంలో మాత్రం మెదక్ మాత్రం ఎక్కడ వేసిన గొంగడి అక్కడే ఉందన్నారు. మెదక్ పట్టణానికి చెందిన న్యాయవాది జీవన్ రావు మాట్లాడుతూ.. ఉద్యమంలో పాల్గొన్న వారిన ఎమ్మెల్యే పట్టించుకోవడం లేదన్నారు.
