- ట్రీట్ మెంట్ పై అనుమానిస్తూ పేషెంట్ ఫిర్యాదు
- హాస్పిటల్ ను తనిఖీ చేసి నోటీసులిచ్చిన డీఎంహెచ్ వో
హనుమకొండ, వెలుగు: ట్రీట్మెంట్కోసం వెళ్లిన పేషెంట్ నుంచి రూ. లక్షల్లో ఫీజులు వసూలు చేసిన హనుమకొండలోని ప్రైవేట్ హాస్పిటల్కు జిల్లా వైద్యాధికారులు నోటీసులు ఇచ్చారు. వివరాల్లోకి వెళ్తే.. భీమారం గ్రామానికి చెందిన ఓ యువకుడికి కొద్దిరోజుల కిందట జ్వరం రాగా కల్యాణి హాస్పిటల్కు వెళ్లాడు. అతడిని అడ్మిట్ చేసుకుని వైద్య సిబ్బంది వివిధ టెస్టులు చేశారు. ఆపై శ్వాస సంబంధ ఇబ్బందులున్నాయని వెంటిలేటర్ పై ట్రీట్మెంట్ చేశారు. నాలుగు రోజులకు రూ.4.5 లక్షలు బిల్లు వేసినా తగ్గలేదు.
దీంతో పేషెంట్ ను కుటుంబసభ్యులు అక్కడ్నుంచి హైదరాబాద్లోని ఆస్పత్రికి తీసుకెళ్లగా ఒకట్రెండు రోజుల్లోనే ట్రీట్ మెంట్ చేయగా నయం అయింది. దీంతో కల్యాణి హాస్పిటల్ ట్రీట్ మెంట్ ను అనుమాని స్తూ బాధిత కుటుంబసభ్యులు ఈనెల 8న హనుమకొండ డీఎంహెచ్వో ఆఫీస్లో ఫిర్యాదు చేశారు. శుక్రవారం సాయంత్రం డీఎంహెచ్వో అప్పయ్య హాస్పిటల్ కు వెళ్లి తనిఖీ చేశారు. ట్రీట్మెంట్ రేట్ల పట్టిక లేకపోవడం, ఐసీయూ నిర్వహణ తీరుపై అసహనం వ్యక్తం చేశారు.
అధిక బిల్లులపై ఆరా తీసి ఆస్పత్రి మేనేజ్ మెంట్ పై మండిపడ్డారు. అనంతరం హాస్పిటల్యాజమాన్యానికి నోటీసులు ఇచ్చి.. వారం రోజుల్లోగా వివరణ ఇవ్వాలని స్పష్టం చేశారు. దీంతో స్థానికంగా కలకలం రేపగా.. సిటీలోని మరికొన్ని ఆస్పత్రులు అలర్ట్ అయినట్లు తెలిసింది.
