- అటు రూ.లక్షల్లో జీతం... ఇటు అదనపు ఆదాయం
- ఫుడ్ క్వాలిటీ పాటించడం లేదంటున్న కార్మికులు
- భూనిర్వాసితుల గోడు పట్టించుకోని సింగరేణి సంస్థ
మంచిర్యాల, వెలుగు: జైపూర్లోని సింగరేణి థర్మల్ పవర్ ప్లాంట్ (ఎస్టీపీపీ)లో క్యాంటీన్ నిర్వహణ అధ్వానంగా మారిందని ఆరోపణలు వస్తున్నాయి. ప్లాంట్ కోసం భూములు ఇచ్చి రోడ్డునపడ్డ నిర్వాసితులు తమకు ఉపాధి కల్పించాలని మొత్తుకుంటున్నా అధికారులు పట్టించుకోవడం లేదు. కానీ రూల్స్కు విరుద్ధంగా పవర్మెక్ కంపెనీలో పనిచేస్తున్న ఒక ఉత్తరాది ఉద్యోగికి క్యాంటీన్ను కట్టబెట్టడంపై విమర్శలు వస్తున్నాయి. అతడు ఓవైపు పవర్మెక్ ఐటీ విభాగంలో రూ.లక్షల జీతం తీసుకుంటూనే.. మరోవైపు క్యాంటీన్ నడుపుకుంటున్నాడు. ప్లాంట్ను పర్యవేక్షించే ఔట్సోర్సింగ్ అధికారుల అండదండలతో రెండు చేతులా సంపాదిస్తున్నాడు.
భూనిర్వాసితులకు మొండిచేయి...
ఎస్టీపీపీ కోసం భూములు ఇచ్చిన నిర్వాసితులకు ప్లాంట్లో ఉద్యోగాలు కల్పిస్తామని సింగరేణి అధికారులు హామీ ఇచ్చారు. తీరా ఉత్తరాది కార్మికులతో నింపేసి మెజారిటీ భూనిర్వాసితులకు మొండిచేయి చూపారు. ప్లాంట్లో సుమారు 1500 మంది కాంట్రాక్ట్, ఔట్సోర్సింగ్ ఎంప్లాయ్ ఉంటే.. వీరిలో భూనిర్వాసితులు, లోకల్ వర్కర్లు 300 మందే ఉన్నారు. ఇంకా చాలామంది ఉద్యోగం, ఉపాధి కల్పించాలని సింగరేణి అధికారుల చుట్టూ తిరుగుతున్నారు. భూనిర్వాసితులు సొసైటీలుగా ఏర్పడి సివిల్ వర్క్స్, కాంటీన్ మెయింటనెన్స్, ఇతర పనులు అప్పగించాలని కోరుతున్నా పట్టించుకోవడం లేదు. రూల్స్ ప్రకారం క్యాంటీన్కు టెండర్లు పిలిచి తక్కువ రేట్ కోట్ చేసిన సొసైటీలకు అప్పగించాలి. కానీ సింగరేణి యాజమాన్యం ప్లాంట్ నిర్వహణ బాధ్యతలన్నీ ఉత్తరాదికి చెందిన ఔట్సోర్సింగ్ అధికారులకు అప్పగిండంతో వారు చెప్పిందే వేదం అన్నట్టు తయారైంది. దీంతో సింగరేణి అధికారులు ప్లాంట్ వ్యవహారాలతో తమకు ఏమాత్రం
సంబంధం లేదన్నట్టు వ్యవహరించడం విమర్శలకు తావిస్తోంది.
సబ్సిడీలు పొందుతూనే దోపిడీ...
ఎస్టీపీపీలో పనిచేస్తున్న ఉద్యోగులు, కార్మికులకు తక్కువ రేట్లకే రుచికరమైన ఆహారాన్ని అందించేందుకు యాజమాన్యం క్యాంటీన్ను ఏర్పాటు చేసింది. దీనికి విశాలమైన బిల్డింగ్ను కేటాయించడంతో పాటు వాటర్, కరెంట్ ఫ్రీగా సప్లై చేస్తోంది. గ్యాస్, ఫర్నిచర్ పవర్మెక్ కంపెనీ సమకూర్చింది. హౌస్కీపింగ్ కార్మికులనే క్యాంటీన్లో నియమించింది. ఇలా సింగరేణి నుంచి రూ.లక్షల్లో సబ్సిడీలు పొందుతూ ఆహార పదార్థాలకు ఎక్కువ రేట్లు వసూలు చేస్తున్నారని, క్వాలిటీ పాటించడం లేదని కార్మికులు ఆరోపిస్తున్నారు. క్వాంటీన్లో పరిశుభ్రత లోపించిందని అంటున్నారు. ఇటీవల ఓ కార్మికుడికి బజ్జీల్లో వెంట్రుకలు రావడంతో అధికారులకు కంప్లైంట్ చేసినా ఎవరూ పట్టించుకోలేదని తెలిపాడు.
