- సమస్యను పరిష్కరించాలంటూ విద్యార్థుల ఆందోళన
పద్మారావునగర్, వెలుగు: సికింద్రాబాద్ గాంధీ హాస్పిటల్లో నర్సింగ్ విద్యార్థినులు గురువారం ఆందోళనకు దిగారు. బోయిగూడలోని తమ హాస్టల్లో డ్రైనేజీ సమస్య తీవ్రంగా ఉందని, మురుగు పొంగి గదుల్లోకి ప్రవహిస్తోందని దాదాపు 150 మంది విద్యార్థినులు 3 గంటలపాటు నిరసన వ్యక్తం చేశారు. కంపుతో హాస్టల్లో ఉండలేక పోతున్నామని, సొంతూరికి వెళ్లిపోతామంటే కాలేజీ ప్రిన్సిపల్ అంగీకరించడం లేదన్నారు. సమస్యపై ఫిర్యాదు చేసి రోజులు గడుస్తున్నా అధికారులు పట్టించుకోవట్లేదన్నారు.
టాయిలెట్స్కు తాళాలు..
బోయిగూడలోని సికింద్రాబాద్ ప్రభుత్వ నర్సింగ్కాలేజీ, గాంధీ నర్సింగ్ స్కూల్భవనాలకు సంబంధించి కామన్ టాయిలెట్స్లో ఇటీవల డ్రైనేజీ బ్లాక్ అయ్యింది. మూడు రోజులుగా మురుగు వసతి గదుల్లోకి వస్తుండడంతో టాయిలెట్స్కు సిబ్బంది తాళాలు వేశారు. మరోవైపు అధికారుల సూచనతో 300 మంది సికింద్రాబాద్ నర్సింగ్ కాలేజీ విద్యార్థినులు హాస్టల్భవనం విడిచి, ప్రత్యామ్నాయ ఏర్పాట్లు చేసుకున్నారు.
మిగిలిన 150 మంది గాంధీ నర్సింగ్ స్కూల్విద్యార్థినులకు ఒకటి, రెండు టాయిలెట్స్ కేటాయించారు. అయినప్పటికీ సమస్య తీరకపోవడంతో నానా ఇబ్బందులు పడుతున్న వారంతా గురువారం గాంధీ ఆసుపత్రికి వచ్చి ఆందోళన నిర్వహించారు. వీరిని హాస్పిటల్ సెక్యూరిటీ సిబ్బంది అడ్డుకోవడంతో ఉద్రిక్తత నెలకొంది. అనంతరం సూపరింటెండెంట్ ప్రొఫెసర్ రాజకుమారిని కలిసి, తమ సమస్యను మొరపెట్టుకున్నారు.
డ్రైనేజీ సమస్య తీరేవరకు హాస్పిటల్ మెయిన్ బిల్డింగ్ 8వ ఫ్లోర్లో తాత్కాలికంగా గదులను కేటాయిస్తామని చెప్పడంతో ఆందోళన విరమించారు. ఈ మేరకు సిబ్బంది గదులను శుభ్రం చేస్తున్నారు. ఈ గదులను శుక్రవారం నర్సింగ్ స్టూడెంట్స్కు ఇవ్వనున్నారు. మరో 10 రోజుల్లో పరీక్షలు ఉన్నందున సెలవులు ఇవ్వలేమని, విద్యార్థులు ఎగ్జామ్స్పై దృష్టి పెట్టాలని సూపరింటెండెంట్ సూచించారు.
