నేటికీ కామారెడ్డిలోని చాలా ఆస్పత్రుల్లో అందని న్యూట్రిషన్ కిట్లు

• 2 నెలల  కింద ‘కామారెడ్డి’లో స్కీమ్​ ప్రారంభం​
•     ఎన్ని సార్లు అడిగినా స్టాక్​ లేదని చెప్తున్న డాక్టర్లు
•     త్వరగా ఇవ్వాలని గర్భిణుల డిమాండ్​ 

కామారెడ్డి , వెలుగు: గర్భిణుల్లో  రక్తహీనత సమస్యను నివారించి పుట్టే బిడ్డ, తల్లి ఆరోగ్యంగా ఉండాలనే ఉద్ధేశ్యంతో ప్రభుత్వం ప్రారంభించిన ‘కేసీఆర్ న్యూట్రిషన్ కిట్’ ప్రోగ్రామ్​ రెండు నెలల్లోనే ఆపసోపాలు పడుతోంది. కిట్ల సప్లైలో డిలే జరుగుతుండడంతో గర్భిణులకు సకాలంలో అందడం లేదు. జిల్లాలోని ప్రభుత్వ ఆస్పత్రులు, కమ్యూనిటీ హెల్త్​సెంటర్లలో ఇప్పటికీ న్యూట్రిషన్​కిట్లు ఇవ్వలేదని గర్భిణులు వాపోతున్నారు.  

 9 జిల్లాల్లో రక్తహీనత..

రాష్ర్టంలోని  9 జిల్లాల్లో గర్భిణులు ఎక్కువగా రక్తహీనత సమస్యతో బాధపడుతున్నట్లు వైద్యారోగ్య శాఖ అధికారులు గుర్తించారు.  ఇందులో కామారెడ్డి, ఆదిలాబాద్​,  కుమ్రంభీం అసిఫాబాద్,  భద్రాద్రి కొత్తగూడెం,  ములుగు,  జయశంకర్​ భూపాలపల్లి, వికారాబాద్,  నాగర్​ కర్నూల్,   జోగులాంబ గద్వాల జిల్లాలు ఉన్నాయి. రక్తహీనత సమస్యను అధిగమించేందుకు  ‘కేసీఆర్​ న్యూట్రిషన్​ కిట్స్’​ పంపిణీ చేయాలని  ప్రభుత్వం నిర్ణయించింది.  కిట్​లో  కిలో న్యూట్రిషన్​ పౌడర్, కిలో ఖర్జూర,  3 ఐరన్​ సిరప్ బాటిల్స్​,  500 గ్రాముల నెయ్యి,  ఆల్​బెండజోల్​టాబ్లెట్స్,  ఒక కప్పు,  ప్లాస్టిక్​బాస్కెట్ ఉంటాయి. కిట్​ విలువ  రూ. 1,962 వరకు ఉంటుంది.  గర్భం దాల్చిన వారు ఏఎన్​సీ, పీహెచ్​సీల్లో పేరు నమోదు చేసుకున్న తర్వాత 14 నుంచి 27 వారాలకు ( 4 నుంచి 5 నెలల మధ్య) పీహెచ్​సీలో  ఫస్ట్​కిట్​ఇవ్వాలి. ఆ తర్వాత  చెకప్​ కోసం  జిల్లా, సీహెచ్​సీ,  ఏరియా  హాస్పిటల్​కు వెళ్లినప్పుడు ( 28 నుంచి 34 వారాల మధ్య)  8 నుంచి 9 నెలల మధ్య  సెకండ్​ కిట్​ఇవ్వాలి.   

రెండు నెలల కింద ప్రారంభం..

2022 డిసెంబర్​ 21న  స్పీకర్​ పోచారం శ్రీనివాస్​రెడ్డి, రాష్ట్ర వైద్యారోగ్య శాఖ మంత్రి హరీశ్​రావు,   ఆర్​అండ్​బీ శాఖ మంత్రి వేముల ప్రశాంత్​రెడ్డి  న్యూట్రిషన్​కిట్ల పంపిణీ స్కీమ్​ కామారెడ్డి జిల్లాలో ప్రారంభించారు. ఇక్కడి నుంచి  వర్చువల్​సిస్టం ద్వారా  మిగతా 8 జిల్లాల్లో కూడా  ప్రారంభించారు.  త్వరలోనే రాష్ర్ట  వ్యాప్తంగా గర్భిణులకు కిట్లు ఇవ్వనున్నట్లు ప్రకటించారు. 

జిల్లాలో పరిస్థితి

జిల్లాలో 16 వేల మంది వరకు గర్భిణులు ఉన్నా రు. న్యూట్రిషన్ ​కిట్లను పీహెచ్​సీ,  జిల్లా, ఏరియా ఆస్పత్రులు, సీహెచ్​సీల్లో పంచేందుకు ఉంచాలి. 5 నెలల వరకు పీహెచ్​సీల్లో,  రెండో విడత కిట్ జిల్లా, ఏరియా, సీహెచ్​సీల్లో  ఇవ్వాలి.  ప్రస్తుతం జిల్లాలో  కొద్ది రోజుల కింద 6,477 కిట్లు రాగా ఇందులో  4,522 పీహెచ్​సీ స్థాయిల్లో పంపిణీ చేశారు.  ఇక్కడ ఇంకా 1,955 స్టాక్​ ఉన్నాయి.   రెండో విడతలో ఇచ్చేందుకు 8 నుంచి 9 నెలల మధ్య ఉన్న వారికి ఇవ్వటానికి కిట్ల స్టాక్​ లేదు.  కామారెడ్డి జిల్లా హాస్పిటల్,  బాన్స్​వాడ ఏరియా హాస్పిటల్​, ఎల్లారెడ్డి,  గాంధారి , దోమకొండ సీహెచ్​సీల్లో స్టాక్​ లేదు. జిల్లా హాస్పిటల్​కు వారంలో  3 రోజులు  రెగ్యులర్​ చెకప్​ కోసం గర్భిణులు వందలాది మంది వస్తారు.  ఎక్కువ మందికి 9 నెలలు వచ్చినప్పటికీ ఇంకా కిట్స్​ఇవ్వడం లేదు. 8 నుంచి 9 నెలల మధ్య ఉన్న వాళ్లు  సుమారుగా 2 వేల మంది వరకు ఉన్నారని ఆఫీసర్లు చెప్తున్నారు. 

స్టాక్​ లేదని చెప్పిన్రు..

ప్రస్తుతం నాకు 9 నెలలు. వారం కింద  చెకప్​ కోసం వచ్చిన ప్పుడు న్యూట్రిషన్​ కిట్​ స్టాక్​ రాలేదని చెప్పిన్రు. మళ్లీ ఇప్పుడొస్తే అదే మాట చెప్తున్నరు.  స్టాక్​ వచ్చిన తర్వాత ఇస్తాం.. పొమ్మంటున్రు. - కవిత, కాచాపూర్​

స్టాక్​ వచ్చిన వెంటనే సప్లై చేస్తున్నాం

న్యూట్రిషన్​ కిట్స్​ పంపిణీలో  ఇబ్బందులు లేకుండా చూస్తున్నాం.  స్టాక్​ వచ్చింది వచ్చినట్లుగా  పీహెచ్​సీలకు సప్లై చేస్తున్నాం.  జిల్లా, ఏరియా హాస్పిటల్స్​లో కిట్స్​స్టాక్​లేవు. స్టాక్​ రాగానే  గర్భిణులకు పంపిణీ చేయిస్తాం.  - శోభ, డిప్యూటీ డీఎంహెచ్​వో, కామారెడ్డి

ఇంకా ఇవ్వలేదు

రెగ్యులర్​ చెకప్​ కోసం జిల్లా హాస్పిటల్​కు వస్తున్నాం.  ఇంకా కేసీఆర్​ న్యూట్రిషన్​ కిట్​ఇవ్వలేదు. డాక్టర్లు   కిట్​ వాడడం వల్ల ఎంతో మేలని చెప్తున్నారు.  త్వరగా   కిట్​ ఇస్తే  బాగుండు. -  సుజాత,  గుండారం