ఆరోగ్యకరమైన పంటల్ని పండించే సహజమైన సాగు పద్ధతులనే ఆర్గానిక్ ఫార్మింగ్ అంటారు. ఇండియాలో ఈ వ్యవసాయం చేసే రైతులు ఎక్కువగా ఉన్నా, పంట విస్తీర్ణం ఆ రేంజ్లో లేదు. ప్రపంచవ్యాప్తంగా 5.78 కోట్ల హెక్టార్ల విస్తీర్ణంలో నేచురల్గా పంటలు పండిస్తుంటే మన దేశంలో మాత్రం 15 లక్షల హెక్టార్లలోనే సాగు చేస్తున్నారు. ఈ లోటు భర్తీకి ఈమధ్య ఇండియా ఆర్గానిక్ ఫార్మింగ్పై ఆసక్తి చూపుతోంది. సిక్కిం తర్వాత కేరళ, అరుణాచల్ఫ్రదేశ్, రాజస్థాన్ ఇటువైపు ఫోకస్ పెడుతున్నాయి. ఈ లిస్టులో ఇప్పుడు ఒడిశా కూడా చేరింది.
ఒడిశాలో అభివృద్ధిలో అగ్రికల్చర్ సెక్టార్ వాటా 30 శాతం చిల్లరే. అలాగని అక్కడ సేద్యం చేసేవాళ్లు లేరనుకుంటే పొరబాటు. 60 శాతం మంది వ్యవసాయంపైనే ఆధారపడి బతుకుతున్నారు. ఈ పర్సంటేజీని పెంచటానికి నవీన్ పట్నాయక్ (బీజేడీ) ప్రభుత్వం ఆర్గానిక్ ఫార్మింగ్పై దృష్టి పెట్టింది. ఈ మేరకు ఒక పాలసీ రూపొందించింది. ఇప్పుడు ‘పరంపరాగత్ కృషి వికాస్ యోజన (పీకేవీవై)’ని ప్రారంభించింది. మొత్తం 30 జిల్లాల్లో సుమారు 30 శాతం పొలాలను ఈ పథకం కింద సెలెక్ట్ చేసింది.
ఆసక్తి ఉంటే అన్నీ నేర్పుతారు
పీకేవీవై స్కీమ్ కోసం ఎనిమిది జిల్లాల్ని ఎంపిక చేసింది. కంధమాల్, కలహండి, రాయగడ, గజపతి, నయాగఢ్, కొరాపుట్, మయూర్భంజ్, కియోన్జహర్ జిల్లాల్లో ఒక్కో చోట 250 హెక్టార్ల భూమిని ఆర్గానిక్ ఫార్మింగ్కి కేటాయిస్తారు. దీనికి సంబంధించిన డ్రాఫ్ట్ ఆపరేషనల్ గైడ్లైన్స్ని సర్కార్కి అందజేసింది. గవర్నమెంట్ నుంచి గ్రీన్సిగ్నల్ రాగానే కార్యక్రమం అమలును ముమ్మరం చేయనుంది. అప్పటివరకు క్లస్టర్ అప్రోచ్లోనే ముందుకు సాగనుంది. ఈ విధానంలో మొదట ఆర్గానిక్ ఫార్మింగ్ గ్రూపులతో 20 హెక్టార్ల చొప్పున క్లస్టర్ ఏర్పాటుచేస్తారు.
గ్రూపు సభ్యులకు ఈ కొత్త వ్యవసాయంపై ట్రైనింగ్ ఇస్తారు. ఇప్పటికే ఈ పద్ధతిలో సాగు చేస్తున్న ప్రాంతాలకు తీసుకెళ్లి చూపిస్తారు. తప్పొప్పులకు తావు లేకుండా ట్రాన్స్పరెంట్ మేనర్లో సర్వీస్ ప్రొవైడర్లను సెలెక్ట్ చేస్తారు. వాళ్ల ఆధ్వర్యంలోనే రైతులకు ఫీల్డ్ విజిట్లు ఏర్పాటుచేస్తారు. సర్వీస్ ప్రొవైడర్లు రిసోర్స్ పర్సన్లను లీడ్ చేస్తారు. ఆర్గానిక్ ఉత్పత్తుల ప్యాకేజింగ్, లైసెన్సింగ్ వంటి వాటిపై అవగాహన కల్పిస్తారు. ప్రొడక్ట్ల అమ్మకానికి సంతలు నిర్వహిస్తారు. పబ్లిసిటీతోపాటు మార్కెటింగ్ మెలకువలు నేర్పుతారు.
ఒక్కో గ్రూపుకి రూ.10 లక్షలు
పరంపరాగత్ కృషి వికాస్ యోజన(పీకేవీవై) ప్రాజెక్టును రూ.178 కోట్లతో ఐదేళ్లు అమలుచేయాలని హార్టికల్చర్ డిపార్ట్మెంట్ అనుకుంటోంది. ముఖ్యంగా గిరిజన, కొండ ప్రాంతాలతోపాటు వర్షాలపైనే ఆధారపడ్డ ఏరియాల్లో ఆర్గానిక్ ఫార్మింగ్ చేపడతారు. మొక్కల పెంపకం, సహజ ఎరువుల తయారీకి కావాల్సిన ముడి సరుకు కొనుగోలు, వర్మి కంపోస్ట్ తదితర ఖర్చులకు ఆఫ్ ఫామ్, ఆన్ ఫామ్ ఇన్పుట్ సబ్సిడీలను రైతుల అకౌంట్లకే డైరెక్ట్ బెనెఫిట్ ట్రాన్స్ఫర్ (డీబీటీ) మోడ్లో రిలీజ్ చేస్తారు. క్లస్టర్లోని ఒక్కో గ్రూపుకి రూ.10 లక్షలను మూడు విడతల్లో ఇస్తారు. బడ్జెట్ను బట్టి ఈ సంవత్సరం రూ.3 కోట్లతో 1500 హెక్టార్లలో (75 క్లస్టర్లలో) ఆర్గానిక్ ఫార్మింగ్ చేయాలని ఆఫీసర్లు నిర్ణయించారు. ‘మిషన్ ఫర్ ఇంటిగ్రేటెడ్ డెవలప్మెంట్ ఆఫ్ హార్టికల్చర్’లో భాగంగా ఆర్గానిక్ ఫార్మింగ్ సర్టిఫికేషన్ కోసం హార్టికల్చర్ డైరెక్టరేట్ ఆసక్తి గల ఏజెన్సీల నుంచి ప్రపోజల్స్ ఆహ్వానించింది. రైతులకు సాగు నష్టాల్ని తగ్గించాలని, ఇన్కం పెంచాలని ప్రభుత్వం భావిస్తోంది.
సిక్కింలో ఫస్ట్ టైమ్
పాత రోజుల్లో రైతులు ఎక్కువగా ప్రకృతి వ్యవసాయమే చేసేవారు. పశువుల వ్యర్థాలను ఎరువుగా వాడేవారు. ఇప్పుడంతా ఫెర్టిలైజర్లు, పెస్టిసైడ్స్, గ్రోత్ రెగ్యులేటర్స్, జెనెటికల్లీ మోడిఫైడ్ ఆర్గానిజమ్స్నే చల్లుతున్నారు. అవి లేకుంటే పంటలు పండించటం అసాధ్యం అనుకుంటున్నారు. దీనివల్ల ఒక వైపు పెట్టుబడి పెరుగుతుంటే మరో వైపు దిగుబడి దిగజారుతోంది. ఫలితంగా అప్పులపాలై, వాటిని తీర్చలేక, చివరికి సూసైడ్ చేసుకుంటున్నారు. ఈ పరిస్థితి దేశవ్యాప్తంగా ఉంది.
సిక్కిం రైతులు దీనికి భిన్నంగా ఆలోచించారు. ఆ రాష్ట్రం దేశంలోనే తొలిసారిగా ఆర్గానిక్ ఫార్మింగ్ను మొదలుపెట్టింది. అక్కడి రైతులు 16 ఏళ్ల కిందటే రసాయన ఎరువులు, పురుగు మందులు వాడటం ఆపేశారు. ఆ తర్వాత కేరళ, రాజస్థాన్, అరుణాచల్ప్రదేశ్తోపాటు ఇంకొన్ని రాష్ట్రాలు కూడా ఈ బాట పట్టాయి. ఇందులో భాగంగా ఒడిశా పీకేవీవై ప్రోగ్రామ్ పెట్టింది. దీనికోసం కొత్త ఆపరేషనల్ గైడ్లైన్స్ అమలుచేయాలని చూస్తోంది. ఆర్టిఫిషియల్గా తయారుచేసిన మందుల వాడకాన్ని బంద్ చేయటమే లక్ష్యంగా పెట్టుకుంది.
