- ఏర్పాట్లు పూర్తి చేసిన అధికారులు
నిజామాబాద్, వెలుగు: పంట పెట్టుబడి సాయంపై ప్రభుత్వం రైతుల అభిప్రాయాన్ని సేకరించనుంది. ఇందులో భాగంగా మంగళవారం జిల్లాలోని నాలుగు చోట్ల సమావేశాలను నిర్వమించేందుకు అగ్రికల్చర్ ఆఫీసర్లు మోట్రాజ్పల్లి, ఎడపల్లి, ఆర్మూర్, ముప్కాల్లో ఏర్పాట్లు చేశారు. డిప్యూటీ సీఎం మల్లు భట్టివిక్రమార్క నేతృత్వంలోని సబ్ కమిటీ ఈ వీడియో కాన్ఫరెన్స్ ద్వారా రైతులతో నేరుగా మాట్లాడనుంది.
ప్రతి సీజన్లో జిల్లాకు రూ.257 కోట్లు
జిల్లాలో సాగు భూమి 5.80 లక్షల ఎకరాలు ఉంది. ప్రతి సీజన్లో 2,55,461 మంది రైతులకు రూ.257.33 కోట్ల డబ్బును రైతు బంధు స్కీం కింద గత బీఆర్ఎస్ ప్రభుత్వం అందించింది. అనర్హులకు, పంటలు సాగు చేయని వారికీ రైతుబంధు అందిందని విమర్శలు వచ్చాయి. దీంతో ప్రస్తుత కాంగ్రెస్ ప్రభుత్వం ఈ పథకం లోపాలపై దృష్టి సారించింది. సాగుసాయం పారదర్శకంగా అందించేందుకు రైతుల నుంచే అభిప్రాయాలను సేకరించనుంది. బీఆర్ఎస్ సర్కారు రైతుబంధు ను రెండు పంటలకు కలిపి ఎకరాకు రూ.10 వేలు ఇవ్వగా కాంగ్రెస్ పార్టీ రైతు భరోసా కింద రూ.15 పెంచుతామని మేనిఫెస్టోలో చేర్చింది.
హామీ అమలులో భాగంగా అర్హులు మాత్రమే సాయాన్ని పొందాలని కసరత్తు చేస్తోంది. సాగుకు ఉపయోగపడని భూములు, అగ్రికల్చర్ పేరుతో రియల్ దందా చేసే వారిని రైతు భరోసా నుంచి తొలగించాలని నిర్ణయించింది. వందలాది ఎకరాలున్న పెద్ద రైతులు పెట్టుబడి సాయంగా పొందుతున్న తీరును రైతులందరితో చర్చించడానికి వీడియో కాన్ఫరెన్స్ ఏర్పాటు చేసింది.
ఎన్ని ఎకరాలకు రైతు భరోసాను పరిమితం చేయాలి? ఇన్కం ట్యాక్స్చెల్లింపు తదితర అంశాలను చర్చించనున్నారు. డిప్యూటీ సీఎం మల్లూ భట్టివిక్రమార్క నేతృత్వంలో మంత్రులు తుమ్మల నాగేశ్వర్రావు, శ్రీధర్బాబు, మాజీ మంత్రి పోచారం శ్రీనివాస్రెడ్డితో కూడిన సబ్ కమిటీని ఇందుకోసం సీఎం రేవంత్రెడ్డి నియమించారు. జులై 15 నాటిని రిపోర్టు ఇవ్వాలని కోరారు.
ఉదయం 9 గంటలకు షురూ..
జిల్లాలోని నాలుగు రైతు వేదికల వద్ద మంగళవారం ఉదయం 9 గంటలకు వీడియో కాన్ఫరెన్స్ ప్రారంభం అవుతుందని -డీఏఓ వాజీద్హుస్సేన్ ‘వెలుగు’కు తెలిపారు. రైతులు వచ్చి కమిటీ ప్రతినిధులకు తమ అభిప్రాయాలు చెప్పాలని కోరారు.
