- ఇందుకోసం స్పెషల్ కమిటీని ఏర్పాటు చేసిన వాటర్ బోర్డు
- ఇప్పటివరకు స్థానిక జీఎం ఆఫీసుల నుంచి జారీ
- అవినీతికి ఆస్కారం లేకుండా తాజా నిర్ణయం
హైదరాబాద్సిటీ, వెలుగు: మహానగరంలో ఇండ్లు, బిల్డింగులు నిర్మించుకోవాలనుకునేవారు బల్దియా పర్మిషన్ కావాలంటే వాటర్బోర్డు నుంచి ఫీజిబిలిటీ సర్టిఫికెట్తోపాటు విద్యుత్ ఫీజిబిలిటీ సర్టిఫికెట్లు సమర్పించాల్సి ఉంటుంది. వాటర్ బోర్డుకు సంబంధించిన ఫీజిబిలిటీ సర్టిఫికెట్లను గతంలో సర్కిల్ ఆఫీసుల్లోని సంబంధిత డివిజన్ జీఎంలు జారీ చేసేవారు. వాటర్బోర్డు సర్కిల్ఆఫీసుల్లో అప్లయ్చేసుకుంటే అప్రూవ్ చేసి హెడ్డాఫీసుకు పంపేవారు. వాటిని పరిశీలించిన తర్వాత ఉన్నతాధికారులు సర్టిఫికెట్ జారీ చేసేవారు.
అయితే, సర్టిఫికెట్ల జారీకి కొందరు కిందిస్థాయి సిబ్బంది డబ్బు వసూలు చేస్తున్నారన్న ఆరోపణలు ఉన్నాయి. డబ్బు ఇవ్వనివారి దరఖాస్తులను ఏదో సాకు చెప్పి పెండింగ్లో పెడుతున్నారని తెలుస్తోంది. ఈ పరిస్థితిని నివారించి, సర్టిఫికెట్ల జారీ ప్రక్రియను ఈజీ చేయడానికి ఇక నుంచి హెడ్డాఫీస్ నుంచి జారీ చేసేలా అధికారులు నిబంధనల్లో మార్పులు చేశారు.
స్పెషల్ కమిటీ ఏర్పాటు
నిర్మాణదారులకు ఇచ్చే వాటర్ ఫీజిబిలిటి సర్టిఫికెట్ల కోసం వాటర్బోర్డు ఓ కమిటీని ఏర్పాటు చేసింది. ఇందులో బోర్డు రెవెన్యూ డైరెక్టర్, సీజీఎం, జీఎం మెంబర్లుగా ఉంటారు. కొత్త రూల్స్ ప్రకారం ఈ సర్టిఫికెట్ల కోసం దరఖాస్తుదారులు ముందుగా దగ్గర్లోని సీజీఎంలకే దరఖాస్తులు సమర్పించాలి. వారు పరిశీలించి వారం రోజుల్లో హెడ్డాఫీసులోని కమిటీకి పంపుతారు. అప్లయ్ చేసుకున్న 30 రోజుల్లోగా ఫీజు చెల్లించాల్సి ఉంటుంది. కమిటీ దరఖాస్తులను మళ్లీ పరిశీలించి స్థల విస్తీర్ణం, భూమికి సంబంధించి నిజమైన ఓనర్ఎవరు, డాక్యుమెంట్స్ అన్నీ కరెక్టుగా ఉన్నాయా లేదా అన్నది చూస్తుంది.
Also Read : రిమ్స్లో అరుదైన సర్జరీలు
విస్తీర్ణాన్ని బట్టి ఏ సైజ్ కనెక్షన్ ఇవ్వాలన్నది కూడా మెన్షన్ చేస్తారు. నిర్దేశిత 5 పని దినాల్లో రెవెన్యూ విభాగపు చీఫ్ జనరల్ మేనేజర్(సీజీఎం) సర్టిఫికెట్లను జారీ చేస్తారు. గ్రేటర్ పరిధిలోని ఆయా డివిజన్లు, సర్కిళ్ల పరిధిలో నెలకు 150 నుంచి 200 వరకు దరఖాస్తులు వస్తున్నాయని, అవినీతి అంతం, ఆలస్యం జరగకుండా ఉండేందుకే కొత్త విధానాన్ని తీసుకువచ్చినట్టు తెలిపారు.
