- వరదల భయంతో ఇసుక బస్తాలు సిద్ధం చేస్తున్న అధికారులు
భద్రాచలం, వెలుగు : వరదల భయంతో భద్రాచలం వద్ద కొత్తగా నిర్మిస్తున్న కరకట్ట రక్షణకు ఆఫీసర్లు ముందస్తు చర్యలు చేపడుతున్నారు. రూ.38కోట్లతో కూనవరం రోడ్డులో అసంపూర్తిగా ఉన్న కరకట్ట పనులను ఇటీవలే మొదలయ్యాయి. వర్షాలు కురుస్తుండటంతో పాటు ఎగువ నుంచి వర్షపు నీరు, పోలవరం బ్యాక్ వాటర్తో వరదలు భయపెట్టిస్తున్నాయి. స్లూయిజ్నిర్మాణాలు కూడా సగం వరకు జరిగాయి. గోదావరి పొంగి వాటర్ వస్తే మట్టికట్టకు గండ్లు పడే ప్రమాదం ఉంది. కట్టను కాపాడుకునేందుకు ఇసుక బస్తాలను సిద్ధం చేస్తున్నారు. కొత్త మట్టికట్ట వద్ద, స్లూయిజ్వద్ద ఇసుక బస్తాలను రక్షణగా ఉంచుతున్నారు. ప్రస్తుతం భద్రాచలం వద్ద గోదావరి నీటిమట్టం 14 అడుగులకు చేరుకుంది.
ఎన్హెచ్ అథారిటీస్ కొర్రీలు
కరకట్ట నిర్మాణంలో భాగంగా విజయవాడ-–జగదల్పూర్ జాతీయ రహదారిపై కూడా మట్టికట్ట వస్తోంది. సుమారు రూ.40కోట్ల వరకు ఖర్చు చేసి ఫ్లైఓవర్ తరహాలో సీసీ వర్క్స్ కూడా చేపట్టనున్నారు. దీనికి సంబంధించిన డిజైన్లను ఇరిగేషన్ అధికారులు ఇప్పటికే ప్రైవేటు కన్సల్టెన్సీతో తయారు చేయించింది. వీటిని న్యూఢిల్లీలోని నేషనల్ హైవేస్ అథారిటీస్కు పంపించారు.
కానీ డిజైన్పై అభ్యంతరాలు పెడుతూ అనుమతులు ఇవ్వడం లేదు. కూనవరం రోడ్డులో శివారున సరస్వతీ శిశుమందిర్ నుంచి 500 మీటర్ల పొడవున రెండు వైపులా సిమెంట్తో ఎత్తైన గోడలు కట్టి, ఇరువైపులా సర్వీసు రోడ్లు కూడా నిర్మించేలా ప్లాన్ చేశారు. కానీ వరద వచ్చి నీరు నిలిచినప్పుడు రోడ్డును ఎలా కాపాడుతారంటూ? ఎన్హెచ్ అథారిటీస్ డిజైన్కు కొర్రీ పెట్టి ఆపింది. దీంతో పనులు ఆలస్యం అయ్యేలా కన్పిస్తున్నాయి. ఈ లోగా కట్టిన కట్టను కాపాడుకునేందుకు సన్నాహాలు చేస్తున్నారు.
