- మావోయిస్ట్ ప్రభావిత ప్రాంతాల్లో సాయంత్రం 4 గంటల వరకే పోలింగ్
- మహబూబాబాద్ పార్లమెంట్ పరిధిలో 15,32,366 మంది ఓటర్లు
- నేడు ఈవీఎంలు, సామగ్రి పంపిణీకి ఏర్పాట్లు
- ప్రజలు నిర్భయంగా ఓటు వేయాలని పోలీసుల ప్లాగ్ మార్చ్
మహబూబాబాద్, వెలుగు : లోక్సభ ఎన్నికల నిర్వహణకు అధికారులు సర్వం సిద్ధం చేశారు. మహబూబాబాద్పార్లమెంట్పరిధిలో 1809 పోలింగ్ కేంద్రాలను ఏర్పాటు చేయగా, ఇప్పటికే ఆయా కేంద్రాలకు అధికారుల నియామకం, శిక్షణ పూర్తి చేశారు. పార్లమెంట్ పరిధిలో మొత్తం 15,32,366 మంది ఓటర్లు ఉండగా, ఓటు వేసేందుకు వచ్చిన వారికి ఎలాంటి ఇబ్బందులు లేకుండా చర్యలు తీసుకున్నారు.
ముఖ్యంగా మావోయిస్ట్ ప్రభావిత ప్రాంతాల్లో సాయంత్రం 4 గంటల వరకు పోలింగ్ కొనసాగించనున్నారు. ప్రజలు నిర్భయంగా ఓటు వేసేందుకు పోలీసులు ఫ్లాగ్మార్చ్తో భరోసా కల్పించారు. నేడు నియోజకవర్గాల వారీగా ఎలక్షన్మెటీరియల్ పంపిణీ కోసం డిస్టిబ్యూషన్సెంటర్లను ఏర్పాటు చేశారు.
ఈవీఎంల పంపిణీ సెంటర్లు..
డోర్నకల్ నియోజకవర్గ ఎన్నికల సిబ్బందికి సెయింట్ అగస్టిన్ హైస్కూల్, మరిపెడలో ఎలక్షన్ మెటీరియల్ను పంపిణీ చేయనున్నట్లు అధికారులు తెలిపారు. మహబూబాబాద్ నియోజకవర్గం టీఎస్డబ్ల్యూఆర్ఎస్జేసీ, మహబూబాబాద్ లో, నర్సంపేటకు ఏఎంసీ గోదాం_1, నర్సంపేటలో, ములుగుకు ప్రభుత్వ బాలుర కళాశాల, ములుగులో
పినపాకకు మణుగూరు జడ్పీహెచ్ఎస్ లో, ఇల్లందకు ఇల్లంద కేకే కాలనీ సింగరేణి కాలరీస్స్కూల్లో, భద్రాచలం నియోజకవర్గ ఎన్నికల సిబ్బందికి భద్రాచలం ప్రభుత్వ డిగ్రీ, పీజీ కాలేజీలో ఈవీఎం సామగ్రిని పంపిణీ చేయనున్నారు.
మావోయిస్టు ప్రభావిత ప్రాంతాల్లో సాయంత్రం 4 వరకే పోలింగ్..
మహబూబాబాద్ పార్లమెంట్ పరిధిలో ఏజెన్సీ నియోజకవర్గాలైన ఇల్లంద, పినపాక, భద్రాచలం, ములుగు నియోజకవర్గాలు మావోయిస్టు ప్రభావిత ప్రాంతాలు కావడంతో ఉదయం 7 నుంచి సాయంత్రం 4 గంటల వరకు మాత్రమే పోలింగ్ కొనసాగనుంది. మిగిలిన నియోజకవర్గాల్లో ఉదయం 7 నుంచి సాయంత్రం 6 గంటల వరకు పోలింగ్ కొనసాగనుంది.
పోలింగ్ కోసం సర్వం సిద్ధం
మహబూబాబాద్ పార్లమెంట్ పరిధిలో ఎన్నికల నిర్వహణకు 1,174 ప్రాంతాల్లో 1809 పోలింగ్ స్టేషన్లను ఏర్పాట్లు చేశారు. 1,348 కేంద్రాల్లో వెబ్ కాస్టింగ్, 637 కేంద్రాల్లో సీసీ కెమెరాల ఏర్పాటు ఏర్పాటు చేశారు. 335 ప్రాంతాలను సమస్యాత్మక కేంద్రాలుగా గుర్తించారు. పార్లమెంట్ పరిధిలో 228 రూట్లకు 228 సెక్టార్ ఆఫీసర్లను నియమించారు. ఈ పార్లమెంట్ పరిధిలో పురుషులు 7,47,836 మంది, మహిళలు 7,84,424 మంది, ఇతరులు 106, మొత్తంగా 15,32,366 మంది ఓటర్లు ఉన్నారు.
నిర్భయంగా ఓటు వేయాలి
పార్లమెంట్ ఎన్నికల సందర్భంగా ప్రజలంతా నిర్భయంగా తమ ఓటు హక్కును వినియోగించుకోవాలని మహబూబాబాద్ఎస్పీ సుధీర్ రాంనాధ్ కేకన్ అన్నారు. జిల్లా కేంద్రంలోని టౌన్ పోలీస్ స్టేషన్ నుంచి వీఎన్ఆర్ గార్డెన్ వరకు శనివారం పోలీసుల ఆధ్వర్యంలో ఫ్లాగ్ మార్చ్ నిర్వహించారు. కార్యక్రమంలో అడిషనల్ ఎస్పీ జోగుల చెన్నయ్య, తొర్రూర్ డీఎస్పీ సురేశ్, సీసీఎస్ డీఎస్పీ మోహన్, ఎస్బీ సీఐ బాలాజీ వరప్రసాద్, సీఐలు, ఎస్సైలు, కేంద్ర బలగాలు తదితరులు పాల్గొన్నారు.
