- ట్యాబ్లు అందజేసిన సర్కార్
భద్రాచలం, వెలుగు : జిల్లాలో ఆయుష్మాన్ ఆధ్వర్యంలో ఉన్న హోమియో,ఆయుర్వేద ఆసుపత్రుల్లో సిబ్బందికి ఫేషియల్ రికగ్నైజేషన్అటెండెన్స్ను అధికారులు ప్రవేశపెట్టారు. ఉదయం 9 గంటలకు ఒకసారి, సాయంత్రం 4 గంటలకు డ్యూటీ అయిపోయాక రెండో సారి ఈ అటెండెన్స్ ఉంటుంది. పావుగంట గ్రేస్ టైం కేటాయించారు. ఆ తర్వాత వచ్చిన వారికి ఆబ్సెంట్ పడుతుంది.
పనిచేసే చోట ఉండకుండా సుదూర ప్రాంతాల నుంచి స్టాఫ్ వస్తున్నారని, డ్యూటీకి రాకుండా వచ్చిన రోజే అన్ని రోజుల సంతకాలు పెడుతున్నారని ఫిర్యాదులు వస్తున్న నేపథ్యంలో ప్రయోగాత్మకంగా ఆయుస్మాన్ ఈ ఫేషియల్ అటెండెన్స్ కు శ్రీకారం చుట్టింది.
భద్రాద్రికొత్తగూడెం జిల్లాలో 13 డైరక్ట్ ఆసుపత్రులు, ఎన్ఆర్హెచ్ఎం( నేషనల్ రూరల్ హెల్త్ మిషన్) ద్వారా ఆయా పీహెచ్సీల్లో నడిచే 17 ఆసుపత్రులు ఉన్నాయి. ప్రస్తుతం 13 ఆసుపత్రుల్లోనే ఈ విధానం అమలు చేస్తున్నారు. తర్వాత మిగిలిన 17 ఆసుపత్రుల్లో కూడా దీన్ని ప్రవేశపెట్టనున్నారు. ఇందుకోసం వరంగల్లోని ఆయుస్మాన్ విభాగం రీజనల్ డిప్యూటీ డైరక్టర్ కార్యాలయంలో డాక్టర్లకు ఈ ఏడాది మార్చి నెలలో రెండు రోజుల ట్రైనింగ్ ఇచ్చి ట్యాబ్లను అందజేశారు.
ఆన్లైన్లో పేషెంట్ల వివరాలు
పేషెంట్ల వివరాలను రోజూ ట్యాబుల్లో పొందుపరుస్తున్నారు. పేషెంట్ రిజిస్ట్రేషన్లో భాగంగా ఆధార్ నెంబర్,మొబైల్ నెంబర్, అడ్రస్, వ్యాధి, రక్తపరీక్షల వివరాలు నమోదు చేస్తున్నారు. మెడిసిన్స్ కూడా నమోదు చేస్తారు. రిజిస్ట్రేషన్ నెంబర్ ద్వారా తర్వాత మళ్లీ ట్రీట్మెంట్ సమయంలో ఇవన్నీ పరిశీలించడం డాక్టర్లకు ఈజీ అవుతుంది.
యూనిక్ నెంబర్ కొడితే పేషెంట్ పూర్తి వివరాలు వచ్చేస్తాయి. ఇవన్నీ ఏ రోజుకారోజు హెడ్ఆఫీస్కు చేరుతాయి. రోజువారీ ఓపీ, స్టాఫ్ అటెండెన్స్ నేరుగా హెడ్ఆఫీసు నుంచి సూపర్వైజ్ చేస్తారు. ఈ విధానం విధులకు డుమ్మా కొట్టే స్టాఫ్కు చెక్ పెడుతుంది.
ప్రయోగాత్మకంగా అమలు
ఫేస్ రికగ్నైజేషన్ ద్వారా ఆయుస్మాన్ విభాగంలో పనిచేసే స్టాఫ్ ఫేషియల్ అటెండెన్స్ తీసుకోవడాన్ని ప్రయోగాత్మకంగా అమలు చేస్తున్నారు. పారదర్శకత కోసం దీన్ని ప్రవేశపెట్టారు. ప్రతీ రోజూ స్టాఫ్ అటెండెన్స్ తో పాటు, పేషెంట్ల వివరాలు, వారికి అందించే వైద్యం అన్నీ హెడ్డాఫీసుకు చేరుతాయి. ఎన్ఆర్హెచ్ఎం ద్వారా నడిచే ఆయుస్మాన్ ఆసుపత్రుల్లో కూడా త్వరలో అమలు చేసే అవకాశం ఉంది. - డా.వెంకటేశ్వర్లు, హోమియోపతి వైద్యశాల,భద్రాచలం
