ఖమ్మం, వెలుగు: అటానమస్ హోదాను దక్కించుకున్న ఖమ్మం నగరంలోని ఎస్బీఐటీ కాలేజీని సోమవారం హైదరాబాద్ లోని జేఎన్టీయూ అధికారులు సందర్శించారు. కళాశాల ప్రమాణాలను పరిశీలించారు. జేఎన్టీయూ రిజిస్ట్రార్ ప్రొఫెసర్ కె. వెంకటేశ్వరరావు విద్యార్థులతో, సిబ్బందితో మాట్లాడారు. ఇటీవల వరదల కారణంగా నష్టపోయిన విద్యార్థులు, సిబ్బందిని జేఎన్టీయూ అధికారులు పరామర్శించినట్లు కళాశాల చైర్మన్ గుండాల కృష్ణ తెలిపారు. తర్వాత జరిగిన కార్యక్రమంలో వరద బాధిత విద్యార్థులకు, సిబ్బందికి నిత్యావసర వస్తువులను, ఆర్థిక సహాయాన్ని అందించారు.
కళాశాలలో ఈ విద్యా సంవత్సరం ప్లేస్మెంట్స్ పొందిన విద్యార్థులను అభినందించారు. న్యాక్ 'ఏ ప్లస్' , అటానమస్ హోదాను దక్కించుకున్న తరువాత మొట్టమొదటి సారి తమ కళాశాలను సందర్శించిన బృందానికి కళాశాల సెక్రటరీ , కరస్పాండెంట్ జి. ధాత్రి , ప్రిన్సిపల్ డా జి. రాజ్ కుమార్ కృతజ్ఞతలు తెలిపారు. ఈ బృందంలో ప్రొఫెసర్ రవీందర్ రెడ్డి, ప్రొఫెసర్ వెంకటేశ్వరరెడ్డి , ప్రొఫెసర్ రమేశ్ ఉన్నారు.
