- 'వెలుగు' కథనానికి స్పందన
ధర్మసాగర్, వెలుగు: ఆక్రమణకు గురైన ఫారెస్ట్ డిపార్ట్మెంట్కు చెందిన స్థలంలో ఆ శాఖ అధికారులు గురువారం మొక్కలు నాటారు. ధర్మసాగర్ మండలం దేవునూరు శివారు ఇనుపరాతిగుట్టలను ఆనుకుని ఉన్న ఫారెస్ట్ భూములు అన్యాక్రాంతం కావడం, కొంతమంది పట్టాల పేరున చదును చేసే ప్రయత్నం చేస్తుండటంతో 'వెలుగు'లో గురువారం 'ఇనుపరాతి గుట్టలు ఎవరి పట్టానో' అనే కథనం ప్రచురితమైంది.
దీంతో స్పందించిన అధికారులు ఆ స్థలంలో మొక్కలను నాటారు. మొక్కలను తొలగిస్తే కఠిన చర్యలు ఉంటాయని హెచ్చరించారు. వారం రోజుల క్రితం ఫారెస్ట్ ల్యాండ్ ను చదును చేయడానికి వచ్చిన జేసీబీ ని పోలీస్ స్టేషన్ కు తరలించగా గురువారం పోలీసులు ఫారెస్ట్ అధికారులకు అప్పగించారు.
