- వెలుగు’ కథనానికి స్పందన
- విచారణకు ఆదేశించిన అడిషనల్ కలెక్టర్ రోహిత్ సింగ్
జనగామ, వెలుగు : జిల్లా కేంద్రం శివారు యశ్వంతాపూర్లో బీఆర్ఎస్ ఆఫీస్ అక్రమ నిర్మాణం పై అధికారులు స్పందించారు. ‘దర్జాగా కబ్జా’ పేరుతో ‘వెలుగు’లో స్టోరీతో ప్రచురితం కావడంతో జిల్లా యంత్రాంగం కదిలింది. కబ్జాపై విచారణకు కలెక్టర్ రోహిత్ సింగ్ అధికారులకు ఆదేశాలు జారీ చేశారు. ఆదివారం ఆయన ‘వెలుగు’తో మాట్లాడారు. ప్రభుత్వ భూమిని ఎవరు ఆక్రమించినా సహించేది లేదన్నారు. బీఆర్ఎస్ పార్టీ ఆఫీస్ నిర్మాణంలో సర్కారు భూమి కబ్జాకు గురైనట్లు తేలితే రెవెన్యూ చట్టాల ప్రకారం చర్యలు తీసుకుంటామన్నారు.
జనగామ తహసీల్దార్ను పూర్తి విచారణ చేసి, నివేదిక సమర్పించాలని ఆదేశించినట్లు చెప్పారు. నివేదిక ఆధారంగా తప్పనిసరిగా చర్యలు ఉంటాయన్నారు. సర్కారు భూమిని కాపాడే విషయంలో కఠినంగా వ్యవహరిస్తామని తేల్చి చెప్పారు. భూ ఆక్రమణలకు పాల్పడడంపై యశ్వంతాపూర్ వాసులు ఆగ్రహం వ్యక్తం చేస్తున్నారు. అధికారులు స్పందించకుంటే ఆందోళనలు చేస్తామని, లేకుంటే ఆ స్థలంలో పేదలకు గుడిసెలు వేయిస్తామని అంటున్నారు.
