- హౌసింగ్ సెక్రటరీ, ఎండీ రివ్యూ
- ఇందిరమ్మ ఇండ్లపైనా చర్చ
హైదరాబాద్, వెలుగు: హౌసింగ్ కార్పొరేషన్, హౌసింగ్ బోర్డు, రాజీవ్ స్వగృహ, దక్కన్ ఇన్ ఫ్రాస్ట్రక్చర్ అండ్ ల్యాండ్ హోల్డింగ్స్ లిమిటెడ్ (దిల్) పరిధిలోని భూములపై గృహ నిర్మాణ శాఖ ఉన్నతాధికారులు ఆరా తీశారు. ఈ నాలుగు సంస్థలకు సంబంధించిన సమగ్ర వివరాలు ఇవ్వాలని అధికారులను ఆదేశించారు. వీటిపై బుధవారం హైదరాబాద్లోని హిమాయత్ నగర్లో గృహ నిర్మాణ శాఖ సెక్రటరీ జ్యోతిబుద్ధ ప్రకాశ్, హౌసింగ్ బోర్డు, హౌసింగ్ కార్పొరేషన్ ఎండీ వీపీ గౌతమ్ రివ్యూ నిర్వహించారు.
ఈ సందర్భంగా ఆయా సంస్థల అధికారులు పవర్ పాయింట్ ప్రజం టేషన్ ఇచ్చారు. అన్ని జిల్లాల్లో రాజీవ్ స్వగృహ భూములతో పాటు అపార్ట్మెంట్లు ఉండగా, వాటిలో కొన్ని వేలంలో అమ్ముడయ్యాయి. మిగతావి ఖాళీగా ఉన్నాయి. ఈ నేపథ్యంలో వాటి వేలంపై సమావేశంలో చర్చించారు. హౌసింగ్ బోర్డుకు హైదరాబాద్, రంగారెడ్డి పరిధిలో పెద్ద ఎత్తున కమర్షియల్ కాంప్లెక్స్లు, ల్యాండ్స్ ఉన్నాయి.
వాటిని లీజుకు ఇచ్చారు. వాటి అద్దె, లీజు అమౌంట్పై ఉన్నతాధికారులు వివరాలు అడిగి తెలుసుకున్నారు. ఇక దక్కన్ ఇన్ ఫ్రాస్ట్రక్చర్ సంస్థకు దాదాపు 6 వేల ఎకరాల భూమి ఉండగా, వాటిపైనా ఆరా తీశారు. కాగా, త్వరలో ఇందిరమ్మ ఇండ్ల లబ్ధిదారుల ఎంపికను మొదలుపెట్టేందుకు ప్రభుత్వం రెడీ అవుతున్నదని అధికారులకు సెక్రటరీ, ఎండీ తెలిపారు.
కార్పొరేషన్లో ఉద్యోగ ఖాళీలపై చర్చ..
హౌసింగ్ కార్పొరేషన్లో ఉద్యోగ ఖాళీలపైనా సమావేశంలో చర్చ జరిగినట్టు అధికారులు చెప్తున్నారు. డిప్యుటేషన్పై వెళ్లిన కార్పొరేషన్కు చెందిన అధికారులను మాతృశాఖకు తీసుకొస్తేనే ఇందిరమ్మ ఇండ్ల స్కీమ్ను అమలు సాధ్యమవుతుందని సెక్రటరీ, ఎండీలకు అధికారులు చెప్పారు. ఈ అంశాన్ని హౌసింగ్ మంత్రి దృష్టికి తీసుకెళ్తామని సెక్రటరీ, ఎండీ తెలిపారు. కాగా, హౌసింగ్ సెక్రటరీ జ్యోతి బుద్ధప్రకాశ్, ఎండీ వీపీ గౌతమ్ను హౌసింగ్ ఇంజనీర్స్, వర్క్ ఇన్ స్పెక్టర్స్ అసోసియేషన్ ప్రెసిడెంట్ రవీందర్ రెడ్డి, జనరల్ సెక్రటరీ రఘువీర్ ప్రసాద్, వర్కింగ్ ప్రెసిడెంట్ వెంకటరమణా రెడ్డి సన్మానించారు.
