ఈ రోజుల్లో స్మార్ట్ఫోన్లను చాలామంది ఏడాదికంటే ఎక్కువ కాలం వాడట్లేదు. కొందరు ఏడాదికో కొత్త ఫోన్ కొనుక్కుని పాత ఫోన్ మార్చేస్తున్నారు. మార్కెట్లోకి కొత్త ఫీచర్లతో మరో ఫోన్ వచ్చిందంటే పాతవాటిని పక్కనపెట్టేస్తున్నారు. పాత ఫోన్లను తిరిగి అమ్మినా మంచి రేటు రావడం లేదు. దీంతో కొందరు ఇంట్లో వాటిని ఊరికే వదిలేస్తున్నారు. అయితే వర్క్ చేసే కండిషన్లో ఉన్న స్మార్ట్ఫోన్లను ఇతర అవసరాల కోసం వాడుకోవచ్చు.
యూనివర్సల్ రిమోట్
మీ స్మార్ట్ఫోన్లో ఐఆర్ (ఇన్ఫ్రా-రెడ్) బ్లాస్టర్ ఉంటే ఫోన్ను యూనివర్సల్ రిమోట్గా మార్చుకోవచ్చు. షావోమీ వంటి కొన్ని బ్రాండ్ ఫోన్లలో ‘ఇన్బిల్ట్ రిమోట్’ కూడా ఉంటుంది. ఇలాంటి ఫోన్లను ఇంట్లోని ఎయిర్ కండీషనర్లు, టీవీలు వంటి ఎలక్ట్రానిక్స్వస్తువులను ఆపరేట్ చేసేందుకు వాడుకోవచ్చు. ఈ ఒక్కదానితోనే అనేక స్మార్ట్ డివైజెస్ ఆపరేట్చేయొచ్చు కాబట్టి, వేర్వేరు రిమోట్ల అవసరం తగ్గుతుంది. ‘ఎయిర్ ప్యూరిఫయర్లు, అమెజాన్ ఫైర్ టీవీ స్టిక్’ వంటివి ఆపరేట్ చేసేందుకు ఫోన్లో ప్రత్యేక యాప్లు ఇన్స్టాల్ చేసుకుని వాడుకోవచ్చు.
సెక్యూరిటీ కెమెరా
మీరు పక్కన పెట్టిన పాత ఫోన్లో కెమెరా బాగా పనిచేస్తోందా? ఇంటర్నెట్ యాక్సెస్ చేయగలదా? అయితే ఆ ఫోన్ను ఇంట్లో సెక్యూరిటీ కెమెరాగా వాడుకోండి. ఇంట్లో మీకు కావాల్సిన చోటును కెమెరా క్యాప్చర్ చేసేలా ఫోన్ను ఫిక్స్ చేయండి. దానికి ఫుల్ చార్జింగ్ ఉండేలా చూడాలి. అలాగే నెట్ కనెక్షన్ తప్పనిసరి. ‘ఐపీ వెబ్క్యామ్, ఎట్హోమ్కెమెరా’ వంటి ఏదైనా యాప్ ఇన్స్టాల్ చేసుకుని, కెమెరా ఆన్ చేస్తే చాలు. ఆ ఫోన్ నుంచి మీ ఫోన్కు నెట్ ద్వారా కనెక్ట్ చేసుకుని అక్కడి దృశ్యాల్ని స్ట్రీమ్ చేసుకోవచ్చు. ఎక్కడున్నా ఇంట్లో ఏం జరుగుతుందో చూడొచ్చు. ఇంట్లో పిల్లలు, వృద్ధులు, పెంపుడు జంతువులను నిత్యం గమనిస్తూ ఉండాలంటే ఈ టెక్నిక్ వాడుకోవచ్చు. అయితే ఫోన్ చార్జింగ్, ఇంటర్నెట్ ఉండేలా చూసుకోవాలి. పాత ఫోన్లలో కెమెరా బాగుండి, వీడియో రికార్డింగ్ చేయగలిగితే కార్ డ్యాష్-క్యామ్గా వాడొచ్చు. కారులో వీడియో రికార్డింగ్ ఆన్ లో ఉంచాలి.
యునిఫైడ్ రిమోట్
ఫోన్లో ‘యునిఫైడ్ రిమోట్’ అనే యాప్ ఇన్స్టాల్ చేసుకుంటే పర్సనల్ కంప్యూటర్ కు వైర్లెస్ కంట్రోలర్గా వాడుకోవచ్చు. ఇది ‘విండోస్, మ్యాక్, లైనక్స్ బేస్డ్ కంప్యూటర్ల’పై అనేక ఫంక్షన్స్ నిర్వహించేందుకు ఉపయోగపడుతుంది. ‘వైర్లెస్ కీబోర్డ్, మిర్రరింగ్ పీసీ స్క్రీన్, ఫైల్ మేనేజర్, క్రోమ్ రిమోట్ డెస్క్టాప్’ వంటి సర్వీసెస్ అందిస్తుంది ఈ యాప్.
