భద్రాచలం, వెలుగు : అంతర్జాతీయ ఒలింపిక్ డే సందర్భంగా ఈనెల 20వ తేదీన దమ్మపేటలో ప్రారంభమైన ఒలింపిక్ డే రన్ క్రీడాజ్యోతి శుక్రవారం భద్రాచలం చేరుకుంది. చర్ల రోడ్డులోని నన్నపనేని మోహన్ హైస్కూల్ వద్ద ఎమ్మెల్యే తెల్లం వెంకట్రావుకు క్రీడాజ్యోతిని అందించారు. అనంతరం ఆయన రన్లో పాల్గొన్నారు. ఇల్లెందు వెళ్లి అక్కడి నుంచి ఈనెల 23వ తేదీన కొత్తగూడెంలో రన్ ముగియనుంది.
ఈ సందర్భంగా ఎమ్మెల్యే వెంకట్రావు మాట్లాడుతూ భద్రాచలం మన్యం నుంచి ఎందరో గిరిజన క్రీడాకారులు జాతీయ, అంతర్జాతీయ స్థాయిలో ప్రాతినిధ్యం వహించారని గుర్తు చేశారు. ఒలంపిక్ క్రీడలపై అవగాహన కల్పించేందుకు ఏర్పాటు చేసిన ఒలింపిక్ డే రన్ ను విజయవంతం చేయాలని పిలుపునిచ్చారు. ఈ కార్యక్రమంలో జిల్లా ఒలింపిక్ అసోషియేషన్ జనరల్ సెక్రటరీ మహీధర్, జాయింట్సెక్రటరీ నాగేందర్, అథ్లెటిక్కోచ్ జన్ను గిరిప్రసాద్, బీపీఎల్ స్కూల్పీడీ దుర్గారావు, జిల్లా బేస్బాల్ సెక్రటరీ ప్రవీణ్, పీడీ శ్వేత, ఇందు తదితరులు పాల్గొన్నారు.
