నిజామాబాద్, వెలుగు : జిల్లా సహకార కేంద్ర బ్యాంక్(డీసీసీబీ) చైర్మన్ పోచారం భాస్కర్రెడ్డిపై 15 మంది డైరెక్టర్లు అవిశ్వాస తీర్మానం కోరుతున్న నేపథ్యంలో ఈ నెల 21న ప్రత్యేకంగా మీటింగ్ఏర్పాటు చేసినట్లు డీసీవో శ్రీనివాస్ వెల్లడించారు. ఉదయం 11 గంటలకు సభ్యులందరూ హాజరుకావాలని నోటీసులు పంపామన్నారు. పాలకవర్గంలో మొత్తం 20 మంది డైరెక్టర్లకు ఓటు హక్కు ఉండగా, అందులో 15 మంది అవిశ్వాసం కోరుతూ సంతకాలు చేసి లెటర్ సమర్పించారన్నారు. అందరి సంతకాలను నిర్ధారించుకున్న తర్వాత 15 రోజులు గడువు ఇచ్చి మీటింగ్ నిర్ణయిస్తున్నట్లు చెప్పారు. బ్యాంక్ పాలకవర్గ పదవీకాలం వచ్చే ఏడాది ఫిబ్రవరి వరకు ఉందని స్పష్టం చేశారు.
వైస్ చైర్మన్ క్యాంప్లో డైరెక్టర్లు
చైర్మన్ భాస్కర్రెడ్డికి వ్యతిరేకంగా అవిశ్వాస రాజకీయానికి తెరలేపిన వైస్ చైర్మన్ కుంట రమేశ్రెడ్డి క్యాంప్లోనే 15 మంది డైరెక్టర్లు ఉన్నారు. హైదరాబాద్సమీపంలోని మేడ్చల్ రిసార్ట్లో వారికి బస ఏర్పాటు చేశారు. క్లాస్–1 కాంట్రాక్టరయిన రమేశ్రెడ్డి చైర్మన్ పదవి ఆశించారు. అప్పటి జిల్లా మంత్రి ప్రశాంత్రెడ్డి కూడా మద్దతు తెలిపారు. కానీ తన తండ్రి పలుకుబడితో భాస్కర్రెడ్డి చైర్మన్పదవి దక్కించుకున్నారు.
అనంతరం ఆయన వ్యవహరించిన తీరుపై మెజార్టీ డైరెక్టర్లలో అసమ్మతి నెలకొంది. రాష్ట్రంలో బీఆర్ఎస్అధికారంలో ఉండడంతో అంతా సైలెంట్గా ఉన్నారు. తాజాగా ప్రభుత్వం మారడంతో అసమ్మతి బయట పడింది. కాంగ్రెస్ పార్టీ నేతల గ్రీన్సిగ్నల్తో వైస్చైర్మన్ రమేశ్రెడ్డి డీసీసీబీ అవిశ్వాస రాజకీయాలకు తెరలేపారు. బ్యాంక్ను కాంగ్రెస్ పరం చేయడానికి పావులు కదుపుతున్నారు.
ఎంపీ టికెట్కోసం భాస్కర్రెడ్డి ఆరాటం
పోచారం భాస్కర్రెడ్డి బీఆర్ఎస్ నుంచి జహీరాబాద్ఎంపీ టికెట్ఆశిస్తున్నారు. డీసీసీబీ చైర్మన్ పదవి ఇప్పించినట్లే కొడుకును లోక్సభ బరిలో దింపడానికి తండ్రి పోచారం శ్రీనివాస్రెడ్డి ఆరాటపడుతున్నారు. సిట్టింగ్ఎంపీ బీబీ పాటిల్తో భాస్కర్రెడ్డి టికెట్అవకాశాలు దెబ్బతినొద్దనే ఉద్దేశంతో ఆయనే పార్టీ వీడేలా చేశారనే ప్రచారం కూడా జరుగుతోంది. తాజాగా అవిశ్వాసంతో భాస్కర్రెడ్డికి పదవి గండం పొంచి ఉండడంతో తండ్రి పోచారం శ్రీనివాస్రెడ్డి ఎంపీ టికెట్ ప్రయత్నాలను ముమ్మరం చేస్తున్నారు.
