మధిర, వెలుగు : తనను మధిర నియోజకవర్గ ప్రజలు గెలిపిస్తే ఈ ప్రాంతాన్ని మరింత అభవృద్ధి చేస్తానని జడ్పీ చైర్మన్, బీఆర్ఎస్ అభ్యర్థి లింగాల కమల్రాజు ఓటర్లను కోరారు. కేసీఆర్ మూడో సారి ముఖ్యమంత్రి కావడం ఖాయమని ధీమా వ్యక్తం చేశారు. మంగళవారం మధిరలో ఏర్పాటు చేసి ప్రజా ఆశీర్వాద సభకు సీఎం కేసీఆర్ హాజరయ్యారు. ఈ సందర్భంగా లింగాల కమల్రాజు మాట్లాడారు.
తెలంగాణలోని అభివృద్ధి, సంక్షేమ పథకాలను ఆంధ్రా ప్రజలు క్షుణ్ణంగా పరిశీలిస్తున్నారన్నారు. తాము తెలంగాణలో కాకుండా ఆంధ్రాలో ఎందుకు ఉన్నామా అని బాధపడతున్నారని తెలిపారు. దీనిని బట్టి తెలంగాణ రాష్ట్రం ఏ స్థాయిలో అభివృద్ధి చెందిందో అర్థమవుతోందన్నారు.
దళితబంధు పథకాన్ని ప్రవేశపెట్టి మొదట నాలుగు మండలాలను పైలట్ప్రాజెక్టుగా తీసుకుంటే అందులో మధిర నియోజకవర్గంలోని చింతకాని మండలాన్ని పెట్టిన ఘనత సీఎం కేసీఆర్దేనన్నారు. భట్టి విక్రమార్క అడగకపోయినా మధిరకు 100పడకల ఆసుపత్రి మంజూరు చేసిన సీఎంకు ఆయన కృతజ్ఞతలు తెలిపారు.
మధిర బీఆర్ఎస్లో ఫుల్ జోష్
మధిరలో ప్రజా ఆశీర్వాద సభ సక్సెస్ కావడంతో స్థానిక బీఆర్ఎస్ నాయకులు, కార్యకర్తల్లో ఫుల్జోష్ వచ్చింది. మధిర, ఎర్రుపాలెం, బోనకల్, చింతకాని, ముదిగొండ మండలాల నుంచి ప్రజలు పెద్ద సంఖ్యలో సభకు తరలివచ్చారు. సభలో మధుప్రియ పాటలకు లింగాల కమల్ రాజు స్టెప్పులు వేసి ప్రజలను ఆకట్టుకున్నారు. ఈ సభలో మాజీ స్పీకర్మధుసూదనాచారి, ఎంపీ నామా నాగేశ్వరరావు, రాష్ట్ర విత్తనాభివృద్ధి సంస్థ చైర్మన్ కొండబాల కోటేశ్వరరావు, ఎమ్మెల్సీ, పార్టీ జిల్లా అధ్యక్షుడు తాతా మధుసూదన్, సంభాని చంద్రశేఖర్, డీసీసీబీ చైర్మన్ కూరాకుల నాగభూషణం, వైస్ చైర్మన్ దొండపాటి వెంకటేశ్వరరావు, మున్సిపల్ చైర్పర్సన్, వైస్చైర్పర్సన్ మొండితోక లత, శీలం విద్యాలత వెంకటరెడ్డి, ఎంపీపీ మెండెం లలిత, ప్రజాప్రతినిధులు, బీఆర్ఎస్ నాయకులు పాల్గొన్నారు.
నామాపై సీఎం ప్రశంసలు
మధిర, వైరా పర్యటనలో సీఎం కేసీఆర్ ఖమ్మం ఎంపీ నామా నాగేశ్వరరావుపై ప్రశంసలు కురిపించారు. రైతుల వెన్నంటూ ఉండే నాయకుడని అని మెచ్చుకున్నారు. ‘నామా నాగేశ్వరరావు ఈ మధ్య నన్ను కలిసిన్రు. వైరా ప్రాజెక్టులో నీటి నిల్వలు లేక, ప్రాజెక్టు కాల్వల కింద వేసిన పంటలు సాగునీరు అందక ఎండిపోతున్నాయని చెప్పిన్రు.
ALSO READ : వెలుగు కార్టూనిస్ట్కు ఇంటర్నేషనల్ అవార్డు
వెంటనే నేను అధికారులతో మాట్లాడిన. ప్రాజెక్టులోకి నీటిని వదిలేలా చేసిన. ఇప్పుడు ప్రాజెక్టు నీటితో బ్రహ్మాండంగా ఉంది. పంటలకు సాగునీటి సమస్య కూడా తీరిపోయింది. అదే కాంగ్రెస్ అధికారంలో ఉంటే ఇది సాధ్యమా’ అని కేసీఆర్ ప్రశ్నించారు. వడగండ్ల వానకు మొక్కజొన్న, ఇతర పంటలు దెబ్బతిన్నాయని, ఆ సందర్భంగా తాను, నామా నాగేశ్వరరావుతో కలిసి బోనకల్ మండలంలో పర్యటించిన సమయంలో ఎకరాకు రూ.10 వేల నష్ట పరిహారం ప్రకటించి రైతులను ఆదుకున్నామని సీఎం గుర్తుచేశారు.
