ఆ యువకుడు ‘king 527’ అనే ఆన్లైన్ గేమ్ ను తన ఫోన్లో డౌన్ లోడ్ చేసుకొని సరదాగా ఆడాడు. అయితే ఈసారి అతడు ఆడిన గేమ్.. ఇంతకుముందు ఆడిన గేమ్లలా సాఫీగా సాగలేదు. అతడి ఫోన్ నంబర్ తో లింక్ అయి ఉన్న బ్యాంకు అకౌంట్ను ఖాళీ చేస్తూ గేమ్ ముందుకుసాగింది. చూస్తుండగానే బ్యాంక్ అకౌంట్ లోని దాదాపు రూ.95 లక్షలన్నీ అయిపోయాయి. విస్తుపోయే ఈ ఘటన రంగారెడ్డి జిల్లా షాబాద్ మండలం సీతారాంపూర్ గ్రామంలో చోటుచేసుకుంది. అకౌంట్లో నుంచి డబ్బులు ఖాళీ అయిన విషయాన్ని యువకుడు వెళ్లి తన తల్లిదండ్రులకు చెప్పాడు. దీంతో వెంటనే వారు సైబర్ క్రైమ్ పోలీసులకు ఫిర్యాదు చేశారు.
‘king 527’ గేమ్ ఆడి డబ్బులు పోగొట్టిన ఆ యువకుడు ప్రస్తుతం నిజాం కాలేజీలో డిగ్రీ మొదటి సంవత్సరం చదువుతున్నాడు. గేమ్ లో పోగొట్టిన ఆ డబ్బులన్నీ సీతారాంపూర్ గ్రామంలో భూనిర్వాసితుల పరిహారం కింద తమకు ప్రభుత్వం నుంచి వచ్చినవేనని యువకుడి తల్లిదండ్రులు, కుటుంబ సభ్యులు తెలిపారు. తమకు జీవితంలో ఆసరాగా ఉంటాయని భావించిన భూ పరిహారం డబ్బులన్నీ క్షణాల్లో అకౌంట్ నుంచి ఖాళీ అయ్యాయని తలుచుకొని వారు కన్నీటి పర్యంతమవుతున్నారు. సైబర్ నేరగాళ్లను గుర్తించి, తమకు డబ్బులు తిరిగి ఇప్పించాలని వారు పోలీసు ఉన్నతాధికారులను వేడుకుంటున్నారు.
