మెహిదీపట్నం, వెలుగు: సిటీలోని నీలోఫర్ ఆసుపత్రిలో నెల రోజుల బాబు కిడ్నాప్కు గురయ్యాడు. సంగారెడ్డి జిల్లా జహీరాబాద్ కు చెందిన హసీనా బేగం, గఫర్ దంపతులకు నెల రోజుల కింద బాబు పుట్టాడు. కొన్నిరోజులకు జాండీస్ అటాక్ అవ్వడంతో వైద్యం కోసం సిటీలోని నీలోఫర్ హాస్పిటల్ లో అడ్మిట్చేశారు. చికిత్స అనంతరం డాక్టర్లు శనివారం సాయంత్రం డిశ్చార్జ్ చేశారు. హసీనా బేగం తన తల్లితో కలిసి బాబును బయటకు తీసుకెళ్తుండగా, ఓ గుర్తుతెలియని మహిళ వారివద్దకు వచ్చింది. తాను ఆస్పత్రి సిబ్బందిని అని నమ్మబలికింది. వెళ్లి మందులు తెచ్చుకోండి అప్పటివరకు బాబును చూస్తానని చెప్పింది.
ఇద్దరూ వెళ్లి మందులు తెచ్చుకునే గ్యాప్లో ఆ మహిళ బాబుతో జారుకుంది. ఎంత వెతికినా కనిపించకపోవడంతో చివరికి నాంపల్లి పోలీస్ స్టేషన్లో ఫిర్యాదు చేశారు. బాధితుల ఫిర్యాదుతో కేసు నమోదు చేసినట్లు ఏసీపీ సంజయ్తెలిపారు. సీసీ కెమెరాల ఆధారంగా దర్యాప్తు చేపట్టగా, శనివారం అర్ధరాత్రి 11 గంటల టైంలో ఏపీలోని కర్నూల్ టోల్గేట్ వద్ద బస్సులో బాబును గుర్తించారు. అక్కడి పోలీసుల సహకారంతో మహిళను అరెస్ట్చేసి, బాబును సిటీకి తీసుకొచ్చి తల్లికి అప్పగించారు. కిడ్నాప్చేసిన మహిళకు మరో ఇద్దరు సహకరించినట్లు పోలీసులు తెలిపారు.
