హైదరాబాద్, వెలుగు: వన్ నేషన్.. వన్ ఎలక్షన్ పేరుతో ప్రజాస్వామ్యాన్ని ప్రధాని మోదీ ఖూనీ చేస్తున్నారని సీపీఐ జాతీయ కార్యదర్శి నారాయణ ఆరోపించారు. కేంద్రంలోని బీజేపీ ప్రభుత్వం రాజ్యాంగబద్ధమైన హక్కులను కాలరాస్తూ.. చట్టవిరుద్ధంగా ఆర్డినెన్స్ ద్వారా పార్లమెంట్ ను రద్దు చేసి జమిలి ఎన్నికలకు వెళ్లేందుకు కుట్ర చేస్తోందన్నారు. సోమవారం సీపీఐ రాష్ట్ర సహాయ కార్యదర్శి ఎన్.బాలమల్లేశ్తో కలిసి మగ్ధూంభవన్ లో ఆయన మీడియాతో మాట్లాడారు. బీజేపీ ప్రభుత్వం అనుసరిస్తున్న ప్రజా వ్యతిరేక విధానాలపై దేశవ్యాప్తంగా ఉద్యమిస్తామని హెచ్చరించారు. హైదరాబాద్లో అక్రమ నిర్మాణాలను తొలగించాల్సిందేనని, మూసీని కూడా ప్రక్షాళన చేయాలని నారాయణ పేర్కొన్నారు. ముందుగా రాష్ట్ర ప్రభుత్వం పేదలకు పునరావాసం కల్పించాలని, ఆ తర్వాతే వారిని అక్కడి నుంచి ఖాళీ చేయించాలని సూచించారు.
