- సైనికుల త్యాగాలపై ప్రధాని నరేంద్ర మోదీ ట్వీట్
న్యూఢిల్లీ: మాజీ సైనికుల సంక్షేమం కోసం కేంద్రం తీసుకొచ్చిన ‘వన్ర్యాంక్–వన్ పెన్షన్’ పథకాన్ని ప్రారంభించి పదేండ్లు అయిన సందర్భంగా ప్రధాని నరేంద్ర మోదీ గురువారం ట్విట్టర్లో స్పందించారు. ‘వన్ ర్యాంక్– వన్ పెన్షన్’ అమలు అనేది దేశాన్ని రక్షించడానికి తమ జీవితాలను త్యాగం చేసిన మాజీ సైనిక సిబ్బంది ధైర్యం, త్యాగాలకు అసలైన నివాళి లాంటిదని పేర్కొన్నారు.
దశాబ్ద కాలంగా లక్షలాది మంది పెన్షనర్లు, పెన్షనర్ కుటుంబాలు ఈ పథకం ద్వారా లబ్ది పొందాయని గుర్తు చేశారు. సాయుధ బలగాలను బలోపేతం, దేశానికి సేవ చేసే వారి సంక్షేమం కోసం ప్రభుత్వం కట్టుబడి ఉందని ప్రధాని చెప్పారు. 2014 లోక్‌‌సభ ఎన్నికలకు ముందు బీజేపీ ‘వన్ ర్యాంక్ - వన్ పెన్షన్’ పథకంపై హామీ ఇచ్చింది. ఆ మేరకు అధికారంలోకి రాగానే దీన్ని అమలు చేసింది.
