- ఎస్ఎస్సీ భర్తీ చేసే పోస్టులకు ఆన్లైన్ కోచింగ్
హైదరాబాద్, వెలుగు: స్టాఫ్ సెలెక్షన్ కమిషన్ (ఎస్ఎస్సీ) భర్తీ చేసే పోటీ పరీక్షలకు ఆన్లైన్లో కోచింగ్ అందిస్తామని టీశాట్ సీఈవో బోదనపల్లి వేణుగోపాల్ రెడ్డి తెలిపారు. సోమవారం నుంచి 2025, జనవరి 31 వరకు టీశాట్ నెట్వర్క్ చానెళ్లలో క్లాసులు నిర్వహిస్తామని ఆదివారం ఓ ప్రకటనలో ఆయన తెలిపారు. 39,481 కానిస్టేబుల్ ఉద్యోగాల భర్తీకి ఎస్ఎస్సీ సెప్టెంబర్ 6న నోటిఫికేషన్ విడుదల చేసిందని గుర్తు చేశారు. ఇందులో తెలంగాణ నుంచి 718 మందికి, ఏపీ నుంచి 908 మందికి ఉద్యోగాలు లభిస్తాయని తెలిపారు.
ఈ నేపథ్యంలోనే టీశాట్ ప్రత్యేక పాఠ్యాంశాలతో ప్రణాళికను రూపొందించిందని, ఆన్లైన్లో నాణ్యమైన కంటెంట్ ఇస్తున్నామని వివరించారు. 112 రోజుల పాటు సాగే ఆన్లైన్ క్లాసుల ద్వారా 448 ఎపిసోడ్లలో 224 గంటల క్లాసులను నెట్వర్క్ చానెళ్లు, యూట్యూబ్, యాప్ ద్వారా ప్రసారం చేస్తామన్నారు.. క్లాసులు టీశాట్ నిపుణ చానెల్లో ప్రతి సోమవారం సాయంత్రం 5 నుంచి రాత్రి 7 గంటల వరకు, విద్య చానెల్లో మరుసటి రోజు ఉదయం 5 నుంచి 7 గంటల వరకు ప్రసారం అవుతాయని వివరించారు. కాగా, నవంబర్ 17న టీజీపీఎస్సీ నిర్వహించనున్న 1,388 గ్రూప్ 3 పోస్టుల పోటీ పరీక్షలకు కంటెంట్ను మరో రెండు గంటలు అదనంగా అందించనున్నామని వేణుగోపాల్ రెడ్డి తెలిపారు.
