పద్మవ్యూహంలో అబూజ్​మడ్.. బేస్​ క్యాంప్​లతో కంగారెత్తిస్తున్న కగార్

• మావోయిస్టు అగ్ర నేతలే లక్ష్యంగా చత్తీస్​గఢ్​ దండకారణ్యంలోకి చొచ్చుకెళ్తున్న  గ్రేహౌండ్స్​
• బేస్​ క్యాంప్​లతో కంగారెత్తిస్తున్న ‘కగార్’
• వచ్చే నెల​ 2 నుంచి పీఎల్​జీఏ వారోత్సవాలు
• కాంగ్రెస్​, బీజేపీ నేతలను అలర్ట్​ చేస్తున్న పోలీసులు

భద్రాద్రికొత్తగూడెం/భద్రాచలం, వెలుగు: 2026 మార్చి లోపు మావోయిస్టులను పూర్తిగా నిర్మూలించడమే లక్ష్యంగా కేంద్ర ప్రభుత్వం ముందుకు కదులుతున్నది. మావోయిస్టు అగ్రనేతలే లక్ష్యంగా చత్తీస్​గఢ్​లోని అబూజ్​మడ్​ను పద్యవ్యూహంగా మార్చింది. ‘ఆపరేషన్​ కగార్’​లో భాగంగా ప్రతి 5 కిలోమీటర్లకు ఒక  బేస్​క్యాంపు ఏర్పాటు చేయడంతోపాటు దండకారణ్యంలోకి చొచ్చుకెళ్లేందుకు  పెద్ద ఎత్తున బలగాలను తరలిస్తున్నది. మావోయిస్టులకు పెట్టని కోటగా ఉన్న అబూజ్​మడ్​లో కేంద్ర, రాష్ట్ర బలగాలను మోహరిస్తున్నది. ఇటీవల వరుస ఎన్​కౌంటర్లలో మావోయిస్టులు పెద్ద ఎత్తున మృతిచెందుతుండగా.. వారినుంచి ఎలాంటి ప్రతిఘటన ఎదురుకాకుండా కాంగ్రెస్​, బీజేపీ నేతలను కేంద్రం అలర్ట్​ చేస్తున్నది. మరో వైపు నక్సల్స్​ను అరికట్టడంలో ఆరితేరిన తెలంగాణ గ్రేహౌండ్స్, స్పెషల్​ పార్టీ పోలీసులను రంగంలోకి దిగుతున్నారు.  

ఈ ఏడాదిలో 250 మందికి పైగా మృతి

ఈ ఏడాదిలో ఇప్పటి వరకు చత్తీస్​గఢ్​, తెలంగాణ రాష్ట్రాల్లో జరిగిన ఎన్​కౌంటర్లలో దాదాపు 250 మందికి పైగా మావోయిస్టులు చనిపోయారు. తెలంగాణలో ఈ ఏడాదిలో ఇప్పటివరకూ 42 మంది మావోయిస్టులు అరెస్టయ్యారు. ఇందులో ఐదుగురు ముఖ్యమైన కేడర్​​ నేతలున్నారు. ఛత్తీస్​గఢ్​లో ఎన్​కౌంటర్ల పేరిట మావోయిస్టులు మృతిచెందుతుండడంతో తెలంగాణ పోలీసులు ‘చేయూత’ ప్రోగ్రాం ద్వారా లొంగుబాట్లను ప్రోత్సహిస్తున్నారు. ఇలా ఇప్పటివరకూ 29 మంది మావోయిస్టులు సరెండర్ కాగా, ఇందులో 21 మంది కీలక మావోయిస్టు నేతలున్నారు. 

బేస్​ క్యాంప్​లతో కంగారెత్తిస్తున్న కగార్..

ఓ వైపు చత్తీస్​గఢ్​లో పదుల సంఖ్యలో, తెలంగాణ సరిహద్దు ప్రాంతంలో మూడుకు పైగా బేస్​ క్యాంపులను కేంద్ర బలగాలు, పోలీసులు ఏర్పాటు చేశారు. మావోయిస్టులను నిర్మూలించడమే లక్ష్యంగా ఏర్పాటు చేసిన ‘ఆపరేషన్​కగార్’ లో భాగంగా​ బేస్​ క్యాంప్​లతో మావోయిస్టులకు దడపుట్టిస్తున్నారు. ఈ బేస్​ క్యాంపులు మావోయిస్టులకు మరణ శాసనాలుగా మారుతున్నాయి. దండకారణ్యంలో ప్రతి 5 కిలోమీటర్లకు బేస్​ క్యాంపులను కేంద్ర బలగాలు ఏర్పాటు చేస్తున్నాయి. ఇదే క్రమంలో తెలంగాణ ముఖ ద్వారాలైన భద్రాద్రి కొత్తగూడెం, ములుగు జిల్లాల్లోని చత్తీస్​గఢ్​​ సరిహద్దుల్లో బేస్​ క్యాంపుల ఏర్పాటు మావోయిస్టులను అడవి దాటకుండా చేస్తున్నాయి. ఇదిలా ఉండగా.. బేస్​ క్యాంపుల ఏర్పాటుతో స్థానికంగా ఉన్న గిరిజనులకు ఇబ్బందులు తప్పడం లేదు.  

దద్దరిల్లుతున్న దండకారణ్యం 

అటు పోలీసులు, ఇటు మావోయిస్టుల బూట్ల చప్పుళ్లు, తుపాకుల మోతతో కొద్ది నెలలుగా దండకారణ్యం దద్దిరిల్లుతున్నది. ఇన్​ఫార్మర్ల పేరిట పలువురిని మావోయిస్టులు ఇటీవలి కాలంలో కాల్చి చంపారు. తెలంగాణలోని భద్రాద్రి కొత్తగూడెం, ములుగు జిల్లాలతో పాటు చత్తీస్​గఢ్​లోని బీజాపూర్​, బస్తర్​లోని ఏజెన్సీ ప్రాంతాల్లో పోలీసులు, మావోయిస్టుల సంచారంతో గిరిజనులు క్షణమొక యుగంగా జీవనం సాగిస్తున్నారు. ఇటీవలి కాలంలో జరిగిన వరుస పోలీస్​ ఎన్​ కౌంటర్లలో వందల సంఖ్యలో మావోయిస్టులు మృతిచెందినప్పటికీ.. అదును దొరికినప్పుడల్లా పోలీసులపై మావోయిస్టులు గెరిల్లా దాడులకు పాల్పడుతూ టెన్షన్​ వాతావరణం సృష్టిస్తున్నారు. పెరుగుతున్న పోలీసు దాడులతో మావోయిస్టులు ఓ చోట స్థిరంగా ఉండలేని పరిస్థితి నెలకొన్నదని ఓ పోలీస్  ఆఫీసర్​ పేర్కొన్నారు. 

తెలంగాణలోకి చొరబడకుండా పక్కా స్కెచ్​

తెలంగాణ–చత్తీస్​గఢ్​​ రాష్ట్రాల సరిహద్దుల్లోని దట్టమైన అటవీ ప్రాంతం గుండా భద్రాద్రి కొత్తగూడెం జిల్లా నుంచి తెలంగాణలోకి మావోయిస్టులు రాకుండా భద్రాద్రి పోలీస్​లు ఎప్పటికప్పుడు అడ్డుకట్ట వేయగలుగుతున్నారు. ఈ క్రమంలోనే చత్తీస్​గఢ్​ పోలీసులకు అండగా ఉండడంతోపాటు సరిహద్దు అటవీ ప్రాంతంలో మావోయిస్టులు లేకుండా నిర్మూలించేందుకు తెలంగాణ పోలీసులు, గ్రేహౌండ్స్​, స్పెషల్​ పార్టీ పోలీసులు  దండకారణ్యంలోకి చొచ్చుకెళ్లేందుకు పక్కా స్కెచ్​ వేస్తున్నారు. భద్రాద్రి కొత్తగూడెం జిల్లాకు సమీపంలోని చత్తీస్ గఢ్​​ రాష్ట్రం సుకుమా జిల్లాలో శుక్రవారం జరిగిన ఎన్​కౌంటర్​ 10 మంది మావోయిస్టులు మృతి చెందారు. 

భద్రాద్రి జిల్లాలోని సారపాక ఐటీసీలో మావోయిస్టు ప్రభావిత ప్రాంతాల పోలీస్​ ఉన్నతాధికారుల సమావేశంలో పలు ముఖ్య నిర్ణయాలు తీసుకున్నట్టు తెలుస్తున్నది. ఇందులో భాగంగానే చత్తీస్​గఢ్​లో మావోయిస్టులపై తెలంగాణ పోలీసులు ఆపరేషన్​ మొదలెట్టే అవకాశాలున్నాయి. జిల్లాలో మావోయిస్టులు అడుగు పెట్టిన మరుక్షణంలో వారిని ఎన్​కౌంటర్ లేదా అరెస్టు చేయడం లేదా లొంగిపోయేలా ఒత్తిడి తీసుకువచ్చేలా  భద్రాద్రి పోలీస్​లు పక్కాగా స్కెచ్​ వేసి, ముందుకు సాగుతున్నారు. ఇందులో భాగంగానే ఇటీవలి కాలంలో గుండాల అటవీ ప్రాంతంతోపాటు కరకగూడెం అడవుల్లో పోలీస్​ ఎన్​కౌంటర్ల పేరిట మావోయిస్టు యాక్షన్​ టీంలకు చెక్​ పెట్టారు.  దండకారణ్యంలో జరుగుతున్న పరిణామాల నేపథ్యంలో భద్రాద్రి కొత్తగూడెం ఎస్పీ బి. రోహిత్​ రాజు  ఎప్పటికప్పుడు నిఘా వ్యవస్థను అప్​గ్రేడ్​ చేస్తూ.. ముందుకు సాగుతున్నారు. మావోయిస్టుల కదలికలపై ఎస్పీ నిత్యం నక్సల్స్​ ప్రభావిత ప్రాంతాల పోలీస్​ ఆఫీసర్లతో వీడియో, టెలి కాన్ఫరెన్స్​ ద్వారా సమీక్షిస్తున్నారు. 

పీఎల్ జీఓ వారోత్సవాల నేపథ్యంలో అలర్ట్​

మావోయిస్టులు వచ్చే నెల 2వ తేదీనుంచి పీఎల్​జీఓ వారోత్సవాలను నిర్వహించేందుకు సన్నద్ధమవుతున్నారు. పోలీసులనుంచి పెద్ద ఎత్తున ప్రతిఘటన ఎదురవుతున్నప్పటికీ ఈ వారోత్సవాలను పెద్ద ఎత్తున నిర్వహించాలంటూ మావోయిస్టు నేతలు ప్రకటనలిస్తున్నారు. గ్రామాల్లో పోస్టర్లు వేస్తున్నారు. ఈ నేపథ్యంలో పోలీసులు అలర్ట్ అయ్యారు.  కేంద్రంతోపాటు రాష్ట్రంలో అధికారంలో ఉన్న కాంగ్రెస్, బీజేపీ నేతలను అప్రమత్తం చేస్తున్నారు. తమకు తెలియకుండా ఏజెన్సీ ప్రాంతాల్లో పర్యటించవద్దని ప్రజాప్రతినిధులు, నేతలకు సూచిస్తున్నారు.