- సొంత ఇలాఖాలో సీఎం రేవంత్ రెడ్డిని దెబ్బకొట్టేందుకు ఒక్కటైన ప్రతిపక్షాలు
- క్రాస్ ఓటింగ్తో కాంగ్రెస్ క్యాండిడేట్ను వెంటాడిన ఓటమి
- బీఆర్ఎస్ సిట్టింగ్ ఎంపీ మన్నె శ్రీనివాస్ రెడ్డికి దక్కని డిపాజిట్
మహబూబ్నగర్, వెలుగు: సీఎం రేవంత్ రెడ్డి సొంత ఇలాకా అయిన పాలమూరులో ఆయన్ను దెబ్బకొట్టేందుకు ప్రతిపక్షాలు ఒక్కటిగా పని చేశాయి. లోక్సభ ఎన్నికలకు షెడ్యుల్ వెలువడినప్పటి నుంచి బీఆర్ఎస్, బీజేపీకి ఇంటర్నల్ సపోర్ట్ చేస్తున్నట్లు వార్తలొచ్చాయి. సీఎం కూడా సభలు, సమావేశాల్లో తనను పడగొట్టేందుకు, వంశీని ఓడించి తనను దెబ్బతీయాలని ప్రయత్నిస్తున్నారని చెప్పారు. ఎంపీ ఎన్నికల్లో వెలువడిన ఫలితాలను చూస్తే పెద్ద ఎత్తున క్రాస్ ఓటింగ్ జరిగినట్లు స్పష్టమవుతోంది. బీఆర్ఎస్ సిట్టింగ్ ఎంపీగా ఉన్న మన్నె శ్రీనివాస్రెడ్డి ఏ రౌండ్లో కూడా ఆధిక్యాన్ని సాధించలేదు. అన్ని రౌండ్లలో ఆయన థర్డ్ ప్లేస్కు పరిమితమయ్యారు. బీఆర్ఎస్ ఓటు బ్యాంక్ ఉన్న నియోజకవర్గాల్లో కూడా ఆయనకు లీడ్ రాలేదు.
ఒక్క రౌండ్లో కూడా రాని ఆధిక్యం..
మహబూబ్నగర్ బీఆర్ఎస్ సిట్టింగ్ ఎంపీగా మన్నె శ్రీనివాస్ రెడ్డి బరిలోకి దిగారు. గత పార్లమెంట్ ఎన్నికల్లో ఆయన 41,78 శాతంతో 4,11,402 ఓట్లు సాధించారు. ఈ ఎన్నికల్లో మాత్రం ఆయన 1,54,792 ఓట్లతో థర్డ్ ప్లేస్కు పరిమితమై ఓటమి పాలయ్యారు. ఎన్నికల్లో ఆయనకు డిపాజిట్ కూడా దక్కలేదు. 21 రౌండ్లలో అన్నింట్లోనూ ఆయన థర్డ్ ప్లేస్లోకే పరిమితం కావడం ఆశ్చర్యానికి గురి చేసింది. ఈ పార్టీకి గత నవంబర్లో జరిగిన అసెంబ్లీ ఎన్నికల్లో దేవరకద్ర నియోజకవర్గంలో 44.6 శాతం ఓట్లు, మక్తల్ 30.55, నారాయణపేట 40.97, మహబూబ్నగర్ నియోజకవర్గంలో 37.72 శాతం ఓట్లు పోల్ అయ్యాయి.
పార్లమెంట్ ఎన్నికల్లో మాత్రం ఈ నియోజకవర్గాల్లో ఓటింగ్పూర్తిగా పడిపోయింది. బీఆర్ఎస్ ఓట్ బ్యాంక్ మొత్తం బీజేపీకి ఫిష్ట్ అయినట్లు టాక్ నడుస్తోంది. ఈ నియోజకవర్గాలకు చెందిన బీఆర్ఎస్ లీడర్లు బీజేపీకి ఇంటర్నల్గా సపోర్ట్ చేశారని ఎన్నికల ప్రచారం నుంచే చర్చ నడుస్తోంది. దీనికితోడు బీఆర్ఎస్ క్యాండిడేట్కు మద్దతుగా ఆ పార్టీ మాజీ మంత్రులు, ఎమ్మెల్యేలు ప్రచారం చేసేందుకు పెద్దగా ఇంట్రెస్ట్ చూయించలేదనే ఆరోపణలు కూడా వచ్చాయి. దీంతో ఆయన పార్లమెంట్ పరిధిలోని ప్రతి గ్రామానికి చేరుకోలేక ప్రచార రథాలను పెట్టి ఎలక్షన్ క్యాంపెయిన్ నడిపించాల్సిన పరిస్థితి ఏర్పడింది.
దీనికితోడు పలు సందర్బాల్లో బీఆర్ఎస్ క్యాడర్తో ఇంటరాక్షన్ అయిన ఆ పార్టీకి చెందిన కొందరు ప్రజాప్రతినిధులు ‘మన క్యాండిడేట్ ఎలాగూ ఓడిపోతాడు. ఆయనకు వేసే ఓటును బీజేపీకి వేయండి. ఎట్టి పరిస్థితుల్లో కాంగ్రెస్ గెలవొద్దు’ అని దిశానిర్దేశం చేసినట్లు ప్రచారం కూడా జరిగింది. దీంతోనే ఈ నాలుగు నియోజకవర్గాల్లో బీజేపీకి లీడ్ వచ్చిందనే టాక్ నడుస్తోంది. క్రాస్ ఓటింగ్ కావడంతోనే దేవరకద్రలో 1,810, మక్తల్లో 9,078, నారాయణపేటలో 19,884, మహబూబ్నగర్లో 7,601 లీడ్ వచ్చిందనే చర్చ జరుగుతోంది. ఇక్కడ లీడ్ రావడంతోనే బీజేపీ విజయం సాధించగలిగిందని చెబుతున్నారు.
నాలుగో ‘సారీ’
15 ఏండ్లుగా మహబూబ్నగర్ పార్లమెంట్పై బీఆర్ఎస్ తన ఆధిపత్యాన్ని కొనసాగిస్తూ వచ్చింది. ప్రస్తుతం జరిగిన ఎన్నికల్లో మాత్రం ఆ పార్టీ ఘోర పరాభవాన్ని ఎదుర్కొంది. ఉవ్వెత్తున సాగుతున్న తెలంగాణ ఉద్యమ సమయంలో 2009లో జరిగిన పార్లమెంట్ ఎన్నికల్లో మహబూబ్నగర్ నుంచి బీఆర్ఎస్ చీఫ్ కేసీఆర్ పోటీ చేశారు. 3,66,569 ఓట్లు సాధించగా, 20,184 ఓట్ల మెజార్టీతో కాంగ్రెస్ సిట్టింగ్ ఎంపీ దేవరకొండ విఠల్రావుపై విజయం సాధించారు.
తెలంగాణ రాష్ట్ర ఏర్పాటు తర్వాత 2014లో జరిగిన పార్లమెంట్ ఎన్నికల్లో ఈ పార్టీ నుంచి ఏపీ జితేందర్ రెడ్డి పోటీ చేయగా, 3,34,228 ఓట్లు సాధించారు.కాంగ్రెస్ క్యాండిడేట్గా పోటీ చేసిన మాజీ కేంద్ర మంత్రి జైపాల్రెడ్డిపై 2,590 ఓట్ల స్వల్ప ఆధిక్యంతో గెలుపొందారు. 2019లో జరిగిన ఎన్నికలో మన్నె శ్రీనివాస్ రెడ్డి పోటీ చేయగా 4,11,402 ఓట్లు సాధించారు. అప్పటి బీజేపీ క్యాండిడేట్ డీకే అరుణపై 77,829 ఓట్ల భారీ మెజార్టీతో గెలుపొందారు. తాజాగా జరిగిన ఎన్నికల్లో ఆయన కేవలం 1,54,792 ఓట్లు సాధించి డిపాజిట్ను కూడా కోల్పోయారు.
