- ఎకరాకు రూ. 20 వేలు ఇయ్యాలె
- జనగామ జిల్లా బచ్చన్నపేటలో ఎమ్మెల్యే ముత్తిరెడ్డిని అడ్డుకున్న విపక్షాలు
- బీఆర్ఎస్, బీజేపీ మధ్య వాగ్వాదం
బచ్చన్నపేట, వెలుగు : పంట నష్టపోయిన రైతులకు ఎకరాకు రూ.20 వేలు పరిహారం చెల్లించాలని బీజేపీ, సీపీఎం, కాంగ్రెస్ పార్టీలు ఆదివారం జనగామ జల్లా బచ్చన్నపేట చౌరస్తాలో రాస్తారోకో చేశాయి. జనగామ ఎమ్మెల్యే ముత్తిరెడ్డి యాదగిరిరెడ్డి వచ్చి హామీ ఇచ్చినప్పటికీ ఆందోళన విరమించలేదు. సర్కార్పై తమకు నమ్మకం లేదని స్వయంగా కలెక్టర్, తహసీల్దార్ వచ్చి హామీ ఇవ్వాల్సిందేనని డిమాండ్ చేశారు. కేంద్రం అమలు చేస్తున్న ఫసల్ బీమా రాష్ట్రంలో అమలు చేస్తే ఇప్పుడు పంట నష్టపోయిన రైతులకు మేలు జరిగేదని బీజేపీ జిల్లా ఉపాధ్యక్షులు బేజాటి బీరప్ప అన్నారు.
ఎమ్మెల్యే ముత్తిరెడ్డిని అడ్డుకోవడంతో పోలీసులు, ఆందోళనకారుల మధ్య తోపులాట జరిగింది. కేసీఆర్కు వ్యతిరేకంగా నినాదాలు చేయడంతో బీఆర్ఎస్ నాయకులు బీజేపీ లీడర్లతో వాగ్వాదానికి దిగారు. ఒకదశలో ఇది తోపులాటకు దారి తీసి దాడి చేసుకునేవరకు వెళ్లింది. ఎమ్మెల్యే అక్కడినుంచి వెళ్లిపోయినా రైతులు ఆందోళన విరమించలేదు. దాదాపు నాలుగు గంటలపాటు నిరసన కొనసాగించడంతో జనగామ ఆర్డీవో మధుమోహన్ వచ్చి పరిహారం అందేలా చూస్తానని హామీ ఇచ్చారు. దీంతో ఆందోళన విరమించారు. బీజేపీ రాష్ట్ర నాయకులు కేవీఎల్ఎన్రెడ్డి, జనగామ ఉపాధ్యక్షుడు బేజాటి బీరప్ప, మండలశాఖ అధ్యక్షుడు సద్ది సోమిరెడ్డి, కాంగ్రెస్ నాయకులు నల్లగోని బాలకిషన్, అల్వాల ఎల్లయ్య పాల్గొన్నారు.
సూర్యాపేట–జనగాం హైవేపై రైతుల ధర్నా
సూర్యాపేట : అకాల వర్షాలతో నష్టపోయిన పంటలకు పరిహారం చెల్లించి తమను ఆదుకోవాలని సూర్యాపేట జిల్లా జాజిరెడ్డిగూడెం మండలం వేల్పుచర్ల గ్రామం వద్ద రైతులు ధర్నా చేశారు. ప్రభుత్వానికి నివేదిక పంపించి నష్టపరిహారం అందేలా కృషి చేస్తామని తహసీల్దార్ హామీతో రైతులు ధర్నా విరమించారు.
