- పంతం నెగ్గించుకున్న ఏసీపీ కిరణ్కుమార్
- బోధన్ ఏసీపీగా నియమిస్తూ మళ్లీ ఉత్తర్వులిచ్చిన సర్కారు
- సీసీఎస్కు విజయ్సారథి
నిజామాబాద్, వెలుగు : నిజామాబాద్ జిల్లా బోధన్ ఏసీపీగా కేఎం కిరణ్కుమార్ను తిరిగి నియమిస్తూ గురువారం సాయంత్రం ఉత్తర్వులు జారీ చేశారు. ఇందుకోసం రాజధాని సెంటర్గా పెద్ద తతంగమే నడిచింది. ట్రాన్స్ఫర్ క్యాన్సిల్చేయించే బాధ్యత ఎత్తుకున్న ఓ పెద్ద లీడర్ కిరణ్కుమార్ను బదిలీ చేయించిన మరో పెద్ద లీడర్ను ఒప్పించడానికి శ్రమించినట్లు తెలుస్తోంది. బోధన్తర్వాత సీసీఎస్లో డీఎస్పీ పోస్టింగ్ఇచ్చినా జాయిన్ కాని కిరణ్ తన పంతం నెగ్గించుకున్నారు. ఆయన స్థానంలో బోధన్ ఏసీపీగా అయిదు రోజులు డ్యూటీ చేసిన జె.విజయ్సారథిని బదిలీ చేశారు.
బీజం పడింది అప్పుడే..
తెలంగాణ దశాబ్ది వేడుకల్లో భాగంగా జూన్లో పట్టణ ప్రగతి ప్రోగ్రామ్ సందర్భంగా తనపై హత్యాయత్నం జరిగినట్లు ఎమ్మెల్యే షకీల్ పోలీస్ కంప్లయింట్ ఇచ్చారు. మున్సిపల్ చైర్పర్సన్పద్మ భర్త శరత్రెడ్డి నేతృత్వంలో బీఆర్ఎస్, మజ్లిస్ లీడర్లు ఇందులో ఉన్నారని చెప్పడంతో ఏసీపీ కిరణ్ అంటెప్ట్ టు మర్డర్ కేసులు నమోదు చేయించి, కొందరిని జైలుకు పంపారు. ఈ టైంలో జైలులో ఉన్న తమ పార్టీ లీడర్లను పలకరించడానికి వచ్చిన మజ్లిస్అధినేత, ఎంపీ అసదుద్దీన్ఓవైసీ కొన్ని కామెంట్స్ చేశారు. పోలీసులు అత్యుత్సాహం ప్రదర్శించారని, కవిత గెలుపు కోసం ఎలక్షన్లలో పని చేసిన తమ వారు జైలుకు వెళ్లే పరిస్థితి వచ్చిందని, వచ్చే ఎలక్షన్లో షకీల్ను ఓడిస్తామన్నారు. దీంతో ఎమ్మెల్సీ కవిత పిలుపు మేరకు మున్సిపల్ చైరపర్సన్ పద్మ, ఆమె భర్త శరత్రెడ్డి రెండు సార్లు ఆమెను కలిశారు. తాము ఎమ్మెల్యేతో వరుసగా ఎదుర్కొంటున్న అవమానాలు, కేసులను వివరించారు. మజ్లిస్గుస్సాను చల్లార్చడంతో పాటు శరత్రెడ్డిని ఊరడించడానికి ఏసీపీ కిరణ్ను బోధన్ నుంచి తప్పించే నిర్ణయానికి అప్పుడే బీజం పడినట్లు తెలుస్తోంది.
తెరపైకి విజయ్సారథి
ఒక రాష్ట్ర మంత్రితో బంధుత్వం ఉన్న జె.విజయ్సారథి కొన్నాళ్ల నుంచి పోస్టింగ్ కోసం వెయిట్చేస్తూ హైదరాబాద్ డీజీ ఆఫీసులో ఉన్నారు. కిరణ్ స్థానంలో ఆయనను మంత్రి రెకమండ్ చేయగా, చకాచకా పావులు కదిపి జులై 26న ఆర్డర్స్ ఇప్పించారు. ఆలస్యం చేయకుండా ఆయన మరుసటి రోజే జాయిన్ అయ్యారు. ఈ టైంలో కిరణ్ లీవ్ తీసుకుని హైదరాబాద్లో ఉన్నారు. విషయం తెలుసుకుని తన గాడ్ఫాదర్సూచనతో అక్కడే మకాం వేశారు. సీసీఎస్ డీఎస్పీ పోస్టు ఇచ్చినా చేరలేదు. ఆయనకు అండగా ఉన్న పెద్దాయన ఎలక్షన్లలో సదరు ఆఫీసర్ అవసరాన్ని ప్రభుత్వ పెద్దలకు వివరించి ఒప్పించినట్లు సమాచారం. దీంతో కిరణ్కు పాత పోస్టింగే కన్ఫామ్ చేస్తూ ఆర్డర్స్ఇచ్చారు. బోధన్లో కంటిన్యూ కావాలని ఆగమేఘాల మీద వచ్చి చేరిన విజయ్ సారథి మరో పోస్టుతో సర్దుకోవాల్సి వచ్చింది.
