- పీఎస్లో నిందితుడి మృతి కేసులో ఎస్పీ అపూర్వరావు ఉత్తర్వులు
నల్గొండ అర్బన్, వెలుగు : నల్గొండ జిల్లా చింతపల్లి ఎస్సై సతీశ్రెడ్డిని సస్పెండ్ చేస్తూ ఎస్పీ కె.అపూర్వరావు సోమవారం ఉత్తర్వులు జారీ చేశారు. ఆదివారం ఓ భూవివాదం కేసులో చింతపల్లి మండలంలోని పాలెంతండాకు చెందిన నేనావత్సూర్యానాయక్ను ఎస్ఐ సతీశ్రెడ్డి పోలీస్స్టేషన్కు తీసుకువచ్చాడు. విచారణ కోసం లోపలకు తీసుకువెళ్లిన కొద్దిసేపటికే సూర్యానాయక్ తీవ్ర అస్వస్థతకు గురయ్యాడు. అతడిని దవాఖానకు తీసుకువెళ్లేలోపే చనిపోయాడు.
దీంతో మృతుడి కుటుంబీకులు ఆందోళనకు దిగారు. ఎస్ఐ తీవ్రంగా కొట్టడం వల్లే చనిపోయాడని నిరసన తెలిపారు. విషయం తెలుసుకున్న ఉన్నతాధికారులు సతీశ్రెడ్డిని వెంటనే హెడ్క్వార్టర్కు అటాచ్ చేశారు. విచారణలో ఎస్ఐ భూ వివాదంలో తలదూర్చి అత్యుత్సాహం చూపించాడని తేలడంతో సస్పెన్షన్ వేటు వేశారు. భూ వివాదాలు, సివిల్ విషయాల్లో జోక్యం చేసుకోవద్దని, ఎవరైనా చట్ట వ్యతిరేకంగా వ్యవహరిస్తే కఠిన చర్యలు తప్పవని ఎస్పీ అపూర్వరావు హెచ్చరించారు.
