- థియేటర్లు తగ్గుతున్నయ్
- మన సినిమాలు చైనాలో ఎక్కువ బిజినెస్ చేస్తున్నయ్
ముంబై: మన దేశంలో సినిమా థియేటర్లు తగ్గిపోతుండటం పట్ల ఆందోళన వ్యక్తమవుతోంది. థియేటర్లు మూతపడుతుండడంతో మన సినిమాలు చైనాలో ఎక్కువ బిజినెస్ చేస్తున్నాయని సీనియర్ ప్రభుత్వ ఉద్యోగి ఒకరు వెల్లడించారు. మన సినిమాలు మన దేశంలోనే ఎక్కువ బిజినెస్ చేసేలా చొరవ తీసుకోవల్సి ఉందని మినిస్ట్రీ ఆఫ్ ఇన్ఫర్మేషన్ అండ్ బ్రాడ్కాస్టింగ్ (ఎంఐబీ) సెక్రటరీ అపూర్వ చంద్ర చెప్పారు. ఈ ట్రెండ్ను రివర్స్ చేయాల్సిన అవసరం ఉందని పేర్కొన్నారు. మీడియా, ఎంటర్టెయిన్మెంట్పై ఫిక్కి నిర్వహించిన ఈవెంట్లో అపూర్వ చంద్ర పాల్గొన్నారు. ఆరేళ్ల కిందట దేశంలో 12 వేల దాకా థియేటర్లు ఉండేవని, అవి ఇప్పుడు 8 వేలకి తగ్గిపోయాయని ఆయన చెప్పారు. ఇదే టైములో చైనాలోని ఫిల్మ్ ఎగ్జిబిషన్ హాల్స్ సంఖ్య 10 వేల నుంచి ఏకంగా 70 వేలకి పెరగడాన్ని గమనించాలని పేర్కొన్నారు. మన సినిమాలు ఆ దేశంలో ఎక్కువ బిజినెస్ చేయడానికి ఇదొక కారణమని చెబుతూ, ఈ ట్రెండ్ను మనం రివర్స్ చేయాలని సూచించారు.
ఇందుకు దేశంలో మరిన్ని థియేటర్లు తెరవడమే సరయిన సొల్యూషన్గా పేర్కొన్నారు. ఈ టాస్క్ను దేశంలో కొత్తగా ఏర్పాటయిన ఫిల్మ్ ఫెసిలిటేషన్ ఆఫీస్ (ఎఫ్ఎఫ్ఓ)కి ప్రభుత్వం అప్పచెబుతున్నట్లు అపూర్వ చంద్ర వెల్లడించారు. ఇన్వెస్ట్ ఇండియా, నేషనల్ సింగిల్ విండో పోర్టల్లతో కలిసి ఎఫ్ఎఫ్ఓ ఇందుకోసం పనిచేస్తుందన్నారు. థియేటర్ ఏర్పాటు చేయడం అంటే ఒక ఇండస్ట్రీ నెలకొల్పడం లాంటిదేనని ఆయన పేర్కొన్నారు. 10 లక్షల మంది జనాభా ఉన్న మాల్దా (వెస్ట్ బెంగాల్)లో ఒక్క థియేటర్ కూడా లేకపోవడం దురదృష్టకరమని చెప్పారు. ప్రభుత్వ చొరవతో కర్నాటకలోని చిన్న సిటీలలో గత నాలుగు నెలలలో కొత్తగా ఆరు థియేటర్లు ఏర్పాటయ్యాయని , మరిన్ని రావాల్సి ఉందని ఆయన పేర్కొన్నారు. కిందటి వారాంతంలో రూ. 75 టికెట్ ఆఫర్ చాలా మందిని ఆకట్టుకుందని, మార్నింగ్ షోలకు సైతం జనం ఎగబడ్డారని పేర్కొన్నారు. సినిమా టికెట్ల రేట్లు సమంజసమైనవిగా ఉండాలని ప్రజలు కోరుకుంటున్నట్లు అపూర్వ చంద్ర చెప్పారు. సినిమా ఎగ్జిబిషన్ ఇండస్ట్రీ ఈ విషయాన్ని దృష్టిలో పెట్టుకోవాలని సూచించారు.
సినిమాటోగ్రఫీ యాక్టుకు సవరణలు...
రాబోయే శీతాకాలపు పార్లమెంట్ సమావేశాలలో సినిమాటోగ్రఫీ చట్టంలో మార్పులు తేనున్నట్లు కూడా సెక్రటరీ వెల్లడించారు. ముంబైలోని ఫిల్మ్ మేకర్లతో ఈ దిశగా సోమవారం చర్చలు జరిపినట్లు పేర్కొన్నారు. పైరసీ అరికట్టడంతోపాటు, యూ/ఏ సర్టిఫికేషన్ ఏజ్ మార్పు విషయంలోనూ మార్పులను ఆ వర్గాలు ఆహ్వానిస్తున్నట్లు చెప్పారు. ఐటీ ఇండస్ట్రీలాగే యానిమేషన్, విజువల్ ఎఫెక్ట్స్, గేమింగ్ అండ్ కామిక్స్ (ఏవీజీసీ) కూడా మన దేశంలో పెద్ద రివల్యూషన్ తేగలదని అపూర్వ చంద్ర అభిప్రాయపడ్డారు. గత అయిదు, ఆరేళ్లుగా డిస్కషన్స్ జరుగుతున్నా ఈ రంగాల కోసం సెంటర్ ఆఫ్ ఎక్స్లెన్స్ ఇంకా ఏర్పాటు కాలేదన్నారు. దీని ఏర్పాటుపై కేంద్రం సీరియస్ఉందని, ఇందులో 48 శాతం వాటా తీసుకునేందుకు ప్రభుత్వం నిర్ణయించిందని, మిగిలిన 52 శాతాన్ని ఫిక్కి, సీఐఐలు తీసుకుంటాయని చెప్పారు.
