![ఇజ్రాయెల్ సైన్యం క్యాంపులపై 200కు పైగా రాకెట్ల దాడి](https://static.v6velugu.com/uploads/2024/07/over-200-rockets-attack-israeli-army-camps_dKQSilHUac.jpg)
- తామే ప్రయోగించినట్లు ప్రకటించుకున్న హిజ్బుల్లా
- తమ సీనియర్ కమాండర్ను చంపినందుకేనని వెల్లడి
లెబనాన్: ఇజ్రాయెల్ సైనిక స్థావరాలపై 200కు పైగా రాకెట్లతో దాడి చేశామని లెబనాన్కు చెందిన హిజ్బుల్లా టెర్రరిస్ట్ సంస్థ గురువారం ప్రకటించుకుంది. దక్షిణ లెబనాన్ ప్రాంతానికి నేతృత్వం వహిస్తున్న హిజ్బుల్లా సీనియర్ కమాండర్ను ఇజ్రాయెల్ సైన్యం చంపేసిందని, అందుకు ప్రతీకారంగానే ఈ దాడులకు పాల్పడ్డామని పేర్కొంది. అయితే, ఇప్పటివరకు ఎవరూ చనిపోయినట్లు ఇజ్రాయెల్ వెల్లడించలేదు.
అనేక మిసైళ్లు తమ భూభాగంలోకి వచ్చాయని, అందులో చాలా రాకెట్లను తమ వైమానికి దళాలు పేల్చివేశాయని చెప్పింది. దీంతో ఇజ్రాయెల్లోని చాలా ప్రాంతాల్లో మంటలు చెలరేగాయంది. తమపై దాడులు ఆగిపోయిన వెంటనే దక్షిణ లెబనాన్లోని లాంచ్పోస్ట్లపై కౌంటర్ దాడులు ప్రారంభించామని ఇజ్రాయెల్ మిలటరీ తెలిపింది.
పోయినేడాది అక్టోబర్ 7న ఇజ్రాయెల్పై హమాస్ దాడి, అనంతరం గాజాపై ఇజ్రాయెల్ సైనిక చర్య తర్వాత నుంచి ఇజ్రాయెల్.. లెబనాన్ మధ్య గొడవలు పెరిగాయి. అప్పటినుంచి లెబనాన్తోపాటు ఇరాన్ మద్దతున్న హిజ్బుల్లా గ్రూప్ ఇజ్రాయెల్పై దాడులు చేయడం మొదలు పెట్టింది. ఈమధ్య కాలంలో అవి మరింత తీవ్రతరం అయ్యాయి. ఇజ్రాయెల్కూడా ప్రతీకారం తీర్చుకుంటోంది.