జడ్చర్ల టౌన్/బాలానగర్, వెలుగు: కాంగ్రెస్ పార్టీ నిరుపేదల సంక్షేమమే ధ్యేయంగా పని చేస్తుందని ఆ పార్టీ పాలమూరు క్యాండిడేట్ చల్లా వంశీచంద్రెడ్డి తెలిపారు. శుక్రవారం జడ్చర్ల నియోజకవర్గంలో ప్రచారం నిర్వహించారు. జడ్చర్ల కావేరమ్మపేటలో ఇంటింటి ప్రచారం చేశారు. పట్టణంలోని వేంకటేశ్వరస్వామి ఆలయంలో ప్రత్యేక పూజలు నిర్వహించారు. రాజాపూర్, బాలానగర్ మండల కేంద్రలల్లో నిర్వహించిన సభల్లో పాల్గొన్నారు. జడ్చర్ల ఫ్లై ఓవర్ నుంచి నేతాజీ చౌరస్తా వరకు బైక్ ర్యాలీ నిర్వహించిన అనంతరం కార్నర్ మీటింగ్లో ఆయన మాట్లాడారు.
కాంగ్రెస్ పార్టీతోనే ప్రజాపాలన సాధ్యమని, రాష్ట్రంలో అధికారంలోకి వచ్చిన వెంటనే నిరుపేదల కోసం రాజీవ్ ఆరోగ్య శ్రీ పరిమితిని రూ.10 లక్షలకు పెంచినట్లు చెప్పారు. గతంలో తమ పార్టీ కట్టించిన ఇందిరమ్మ ఇండ్లే ఇప్పటికీ ఉన్నాయని, గత ప్రభుత్వం ఒక్క ఇంటిని కూడా అందించలేదన్నారు. ఎన్నికల కోడ్ ముగిసిన వెంటనే రూ.500కే సిలిండర్ అందిస్తామని, రేషన్కార్డులు ఇస్తామని చెప్పారు. బాలానగర్ నుంచి గంగాపూర్ వరకు రూ.37 కోట్లతో రోడ్ను మంజూరు చేయించానని తెలిపారు. ఎమ్మెల్యే అనిరుధ్రెడ్డి మాట్లాడుతూ వంశీచంద్రెడ్డిని ఎంపీగా గెలిపిస్తే జడ్చర్లను వేగంగా అభివృద్ధి చేసుకొనే అవకాశం ఉంటుందని చెప్పారు. జడ్చర్ల నియోజకవర్గం నుంచి 50 వేల మెజార్టీ ఇవ్వాలని కోరారు.
