నారాయణపేట, వెలుగు: విద్యార్థులు ఉన్నత లక్ష్యాన్ని నిర్దేశించుకొని ఆత్మవిశ్వాసంతో పరీక్షలకు సిద్ధం కావాలని పాలమూరు జిల్లా సీనియర్ సిటిజన్ ఫోరం అధ్యక్షుడు జగపతిరావు సూచించారు. ఆదివారం జిల్లా కేంద్రంలోని శీల గార్డెన్ లో పూసల్ పహాడ్ టాలెంట్ టెస్ట్ విజేతలతో ప్రేరణ సదస్సు నిర్వహించారు. ఈ సందర్భంగా ఆయన మాట్లాడుతూ విద్యార్థుల్లోని ప్రతిభను వెలికి తీసేందుకు ఇలాంటి టాలెంట్ టెస్ట్లు ఉపయోగపడతాయని చెప్పారు.
అనంతరం టాపర్లకు నగదు బహుమతిని, స్కూల్ టాపర్లకు ప్రైజులు అందించారు. సెక్టోరియల్ ఆఫీసర్ నాగార్జున రెడ్డి, హెచ్ఎం బాలకిష్టప్ప, జిల్లా సైన్స్ అధికారి భాను ప్రకాశ్, నోడల్ ఆఫీసర్ సురేశ్ కుమార్, ఏఈలు మహ్మద్ రఫీక్, అనిల్ కుమార్ పాల్గొన్నారు.
