- మరింత సులభంగా బ్యాంకు లోన్లు
- పాత కార్డులూ చెల్లుతాయ్
న్యూఢిల్లీ: క్విక్ రెస్పాన్స్కోడ్(క్యూఆర్ కోడ్) ఫీచర్‌‌తో పాన్ కార్డుల ఉచితంగా ఇవ్వడానికి కేంద్రం రూ. 1,435 కోట్ల పాన్2.0 ప్రాజెక్ట్‌‌ను ఆమోదించింది. పాన్ 2.0 ప్రాజెక్ట్ ప్రభుత్వ ఏజెన్సీల అన్ని డిజిటల్ సిస్టమ్‌‌ల కోసం "కామన్ బిజినెస్ ఐడెంటిఫైయర్"గా పనిచేస్తుంది. ఆదాయపు పన్ను శాఖ జారీ చేసే ప్రత్యేకమైన 10-అంకెల ఆల్ఫాన్యూమరిక్ నంబరే పాన్కార్డు! క్యూఆర్ కోడ్ కార్డులు వచ్చినప్పటికీ వ్యక్తులు, వ్యాపారాల దగ్గర ప్రస్తుతం ఉన్న పాన్ చెల్లుతుంది. సంఖ్యను మార్చాల్సిన అవసరం ఉండదు.
పన్ను చెల్లింపుదారులు ఆన్‌‌లైన్‌‌లోనే తమ పాన్ కార్డుకు సంబంధించిన అన్ని సేవలను పొందవచ్చు. కొత్త పాన్ కార్డుల ద్వారా పన్ను చెల్లింపుదారుల సమాచారం మరింత సురక్షితంగా ఉంటుందని ప్రభుత్వం తెలిపింది. ‘‘కొత్త పాన్ కార్డులను త్వరగా డెలివరీ చేస్తారు. యూజర్ డేటా సురక్షితంగా ఉంటుంది. వ్యక్తులతోపాటు వ్యాపారాలకు ట్యాక్స్ మేనేజ్మెంట్ను సులభతరం చేయడం ఈ ప్రాజెక్టు ఉద్దేశం. పాత కార్డులు చెల్లుతాయి కానీ కొత్త వాటికి అప్గ్రేడ్ కావడం మంచిది. వీటిలో డిజిటల్ వెరిఫికేషన్ ఫీచర్లు ఎక్కువగా ఉంటాయి. ఉదాహరణకు మనం బ్యాంకు లోన్ కోసం వెళ్తే అక్కడి అధికారులు పాన్ కార్డును స్కాన్ చేయగానే మన ట్యాక్స్ హిస్టరీ మొత్తం తెలుస్తుంది. అక్కడే ఐడెంటిఫికేషన్ పూర్తవుతుంది. త్వరగా లోన్ వస్తుంది. ట్యాక్స్ఆడిట్ త్వరగా అవుతుంది”అని ట్యాక్స్స్పానర్ సీఈఓ సుధీర్ కౌశిక్ అన్నారు.
