- ఓపీఎస్లను జేపీఎస్లుగా గుర్తించాలి : మధుసూదన్ రెడ్డి
హైదరాబాద్, వెలుగు : పంచాయతీ కార్యదర్శుల సమస్యలు పరిష్కరించాలని తెలంగాణ పంచాయతీ కార్యదర్శుల సంఘం రాష్ట్ర అధ్యక్షుడు మధుసూదన్ రెడ్డి ప్రభుత్వాన్ని కోరారు. రెగ్యులరైజేషన్ కాలాన్ని నాలుగు సంవత్సరాల నుంచి రెండేండ్లకు తగ్గించి.. వారికి ప్రమోషన్లు కల్పించాలన్నారు. ఔట్ సోర్సింగ్ ద్వారా పంచాయతీ కార్యదర్శల నియామకాలను రద్దు చేయాలని, ప్రస్తుతం ఔట్ సోర్సింగ్ విధానంలో కొనసాగుతున్న కార్యదర్శులను జూనియర్ పంచాయతీ కార్యదర్శులుగా గుర్తించాలని కోరారు.
వారి సర్వీసు కాలాన్ని జూనియర్ పంచాయతీ కార్యదర్శి (జేపీఎస్) సర్వీసుగా పరిగణించాలని కోరారు. ఆదివారం రంగారెడ్డి జిల్లా పరిషత్ సమావేశ మందిరంలో తెలంగాణ పంచాయతీ కార్యదర్శుల రాష్ట్ర స్థాయి కార్యవర్గ సమావేశం జరిగింది. ఈ సందర్భంగా ఆయన మాట్లాడుతూ.. రాష్ట్రంలోని అన్ని పంచాయతీలను గ్రేడ్ –1, 2, 3, 4 గా పునర్ వ్యవస్థీకరించాలన్నారు.
జీవో నం 317 ద్వారా నష్టపోయిన పంచాయతీ కార్యదర్శులను తిరిగి వారి సొంత జిల్లా, జోన్లకు పంపించాలని డిమాండ్ చేశారు. పంచాయతీ రాజ్ చట్టం –2018 లో పంచాయతీ కార్యదర్శులకు సంబంధించిన సెక్షన్లలో సవరణలు చేయాలని మధుసూదన్ రెడ్డి ప్రభుత్వాన్ని కోరారు.
