- గొడ్డలి, కత్తులతో వెంటాడి వేటాడి హత్య చేసిన చిన్నాన్న, ఆయన కొడుకు
- అందరూ చూస్తుండగా ఘటన
- ఆదిలాబాద్జిల్లా ఇచ్చోడలో దారుణం
ఇచ్చోడ, వెలుగు : ఎకరం భూమి కోసం ఆదిలాబాద్ జిల్లా ఇచ్చోడ మండలంలో ఓ చిన్నాన్న, కొడుకుతో కలిసి తన సొంత అన్న కొడుకును దారుణంగా చంపాడు. సీఐ చంద్రశేఖర్, ఎస్సై శ్రీకాంత్ కథనం ప్రకారం..ఇచ్చోడ మండలంలోని గుండివాగు గ్రామానికి చెందిన వానోల్ల లక్ష్మీబాయికి.. బిడ్డతో పాటు కెదోబా, పాండురంగ్అనే కొడుకులున్నారు. కెదోబాను చిన్నప్పుడే గ్రామానికి చెందిన ఓ జంట దత్తత తీసుకుంది.
కెదోబా కొడుకు ఈశ్వర్రావు (36). ఇతడు ఇచ్చోడలోని టీచర్స్కాలనీలో ఉంటూ వ్యవసాయం చేసుకుంటున్నాడు. లక్ష్మీబాయికి నాలుగున్నర ఎకరాల భూమి ఉంది. ఈమెను ఎవరూ చూసుకోకపోవడంతో ఇచ్చోడలోని మనవడైన ఈశ్వర్రావు దగ్గర ఉంటోంది. ఆమెకున్న నాలుగు ఎకరాల్లో ఏడాది కింద కూతురికి అరెకరం, చిన్న కొడుకు పాండురంగ్కు మూడెకరాలు, మరో ఎకరం భూమిని తనను పోషిస్తున్నందున మనవడు ఈశ్వర్కు రాసిచ్చింది.
అప్పటి నుంచి పాండురంగ్ కోపంతో ఉన్నాడు. భూమి విషయంలో ఆయనకు, ఈశ్వర్రావు కుటుంబానికి గొడవలు జరుగుతున్నాయి. పలుమార్లు ఇచ్చోడ పోలీస్స్టేషన్లో ఫిర్యాదులు కూడా చేసుకున్నారు. గ్రామ పెద్దలు పంచాయితీ పెట్టి ఇంతకుముందు లక్ష్మీబాయి పంచిన పద్ధతే కరెక్టని చెప్పారు. అయితే, పాండురంగ్ మాత్రం తన అన్న కేదోబా దత్తత వెళ్లాడని, ఆయన కొడుక్కు వాటా ఎలా ఉంటుందని ప్రశ్నించాడు.
ఎవరూ పట్టించుకోకపోవడంతో ఈశ్వర్ను చంపాలని నిర్ణయించుకున్నాడు. కొడుకు సూర్యకాంత్ తో కలిసి మంగళవారం ఇచ్చోడలోని సిరిచెల్మ చౌరస్తాలో కాపు కాశాడు. ఉదయం 9 గంటల ప్రాంతంలో పాన్షాప్కు వచ్చిన ఈశ్వర్పై అందరూ చూస్తుండగానే గొడ్డలి, కత్తులతో దాడి చేశారు. ఈశ్వర్ తనను కాపాడాలంటూ కేకలు వేస్తూ పరుగులు పెట్టినా వదల్లేదు. వెంటపడి గొడ్డలితో నరికి, కత్తితో పొడిచి చంపారు. తర్వాత పోలీస్స్టేషన్కు వెళ్లి లొంగిపోయారు. సీఐ చంద్రశేఖర్, ఎస్సై శ్రీకాంత్ ఘటనా ప్రాంతాన్ని పరిశీలించారు. కేసు నమోదు చేసి నిందితులను రిమాండ్కు తరలించినట్లుతెలిపారు.
