- పేషెంట్ చైన్ తీశావంటూ చితకబాదిన పంజాగుట్ట పోలీస్
- సరిగ్గా విచారణ జరపకుండా చిరుద్యోగిపై ప్రతాపం
- ఫిర్యాదుదారిడి జేబులోనే గొలుసు
- తప్పు తెలుసుకుని బాధితుడిని వదిలేసిన పోలీసులు
- ఆందోళన బాటలో అవుట్సోర్సింగ్ కార్మికులు
పంజాగుట్ట, వెలుగు : నిమ్స్ హాస్పిటల్కు వచ్చిన ఓ పేషెంట్ మెడలోని గోల్డ్చైన్ దొంగతనం చేశావంటూ ఔట్సోర్సింగ్ఉద్యోగిపై పంజాగుట్ట పోలీసులు ప్రతాపం చూపించారు. ఫిర్యాదు అందిన వెంటనే సరైన పద్ధతిలో విచారణ జరపకుండా చిరుద్యోగిని పీఎస్కు తీసుకువెళ్లి తమకు తెలిసిన పద్ధతిలో ‘పోలీస్ ట్రీట్మెంట్’ ఇచ్చారు. చివరకు ఆ బంగారు గొలుసు ఫిర్యాదుదారుడి జేబులోనే ఉందని తెలుసుకుని అవాక్కయ్యారు. ఆ తర్వాత చేసిన తప్పు తెలుసుకుని బాధితుడికి సారీ చెప్పి పంపారు.
బాధితుడు, నిమ్స్ యూనియన్ లీడర్ల కథనం ప్రకారం.. నిమ్స్ దవాఖాన ఓల్డ్ బిల్డింగ్లో ఎమ్ఆర్ఐ విభాగం ఉంది. దుండిగల్కు చెందిన రవికుమార్ఊపిరితిత్తుల సమస్యతో నిమ్స్కు రాగా, అతడిని ఎంఆర్ఐ తీయించుకోవాలని డాక్టర్లు సలహా ఇచ్చారు. గురువారం మధ్యాహ్నం రవికుమార్ ఎమ్ఆర్ఐ చేయించుకోవడానికి వెళ్లాడు. ఎంఆర్ఐ సెక్షన్ రెండు విభాగాలుగా ఉండగా, ఒక రూములో ఎంఆర్ఐ తీసే టెక్నీషియన్స్, మరో రూమ్లో మెషీన్ ఉంటుంది. మెషీన్ రూమ్లోకి వచ్చే పేషెంట్స్కు అక్కడ ఉండే అటెండర్కు జాగ్రత్తలు చెప్పి పడుకోబెట్టి బయటకు వెళ్తాడు.
రవికుమార్ కూడా మెషీన్ఉన్న రూమ్లోకి వచ్చి తన దగ్గరున్న ఫోన్ను అటెండర్ లింగంకు ఇచ్చాడు. ఎమ్ఆర్ఐ పూర్తయిన తర్వాత రవికుమార్ మెడలోని రెండున్నర తులాల బంగారు గొలుసు కనిపించలేదు. దీంతో ‘మెషీన్రూమ్లోకి నువ్వు మాత్రమే వచ్చావ్. కచ్చితంగా చైన్నువ్వే తీసి ఉంటావ్. నా చైన్నాకు ఇచ్చెయ్’ అంటూ లింగంను నిలదీశాడు. దీంతో తాను ఫోన్మాత్రమే తీసుకున్నానని, గొలుసు సంగతి తెలియదని చెప్పాడు.
దీంతో గొలుసు పోయిందని, తనకు లింగంపైనే అనుమానం ఉందని నిమ్స్సెక్యూరిటీ అధికారులకు రవికుమార్ ఫిర్యాదు చేశాడు. తర్వాత పోలీసులకు ఫిర్యాదు చేయగా వారు సీసీ ఫుటేజీలు పరిశీలించకుండా, ఫిర్యాదుదారుడిని చెక్ చేయకుండా లింగంను స్టేషన్కు తీసుకువెళ్లి కొట్టారు. దీంతో అతడు నడవలేని స్థితికి చేరుకున్నాడు.
ఫిర్యాదుదారుడి జేబులోనే చైన్
గొలుసు పోయిందంటూ ఫిర్యాదు చేసిన రవికుమార్ జేబులోనే చివరకు చైన్ కనిపించింది. లింగంను చితకబాదిన కొద్దిసేపటికి ఎందుకో అనుమానం వచ్చి రవికుమార్ జేబులో చెక్ చేయగా గొలుసు కనిపించింది. దీంతో పోలీసులు షాక్కు గురయ్యారు. ముందే ఫిర్యాదుదారుడిని జేబులో, ఇతర చోట్ల చెక్చేస్తే బాగుండేదన్న ఆలోచనలో పడ్డారు. అప్పటికే లింగంను తీవ్రంగా కొట్టడంతో నడవలేని స్థితికి చేరుకున్నాడు.
దీంతో తప్పయిపోయిందని బతిమిలాడారు. ఫిర్యాదుదారుడు రవికుమార్ను ఇంకోసారి ఇలా చేయొద్దు అని మందలించి పంపేశారు. బాధితుడు యూనియన్ లీడర్లకు, కుటుంబసభ్యులకు చెప్పడంతో తీసుకువెళ్లి హాస్పిటల్లో అడ్మిట్చేశారు. లింగంకు దెబ్బలు తగిలిన మాట వాస్తవమేనని, ఎమర్జెన్సీలో చికిత్స పొందుతున్నాడని నిమ్స్ఆర్ఎంవో తెలిపారు.
పోలీస్ స్టేషన్ను ముట్టడిస్తాం
చేయని నేరానికి పోలీస్స్టేషన్కు తీసుకువెళ్లి విచారణ పేరుతో చితకబాదడాన్ని నిమ్స్లోని సీఐటీయూ యూనియన్ లీడర్లు నిరసన వ్యక్తం చేశారు. ఈ సందర్భంగా యూనియన్ లీడర్ వెంకటేశ్ మాట్లాడుతూ.. నిమ్స్లో ఉద్యోగి లింగంను పోలీస్ స్టేషన్కు తీసుకువెళ్లేప్పుడు కనీసం తమకు గాని, కాంట్రాక్టర్కు గాని సమాచారం ఇవ్వలేదన్నారు.
లింగం నడవలేకపోతున్నాడని, అతనికి న్యాయం చేయాలని డిమాండ్ చేశారు. శనివారం నిమ్స్ డైరెక్టర్ను కలిసి ఫిర్యాదు చేస్తామన్నారు.బాధ్యులైన పోలీసులపై చర్యలు తీసుకోకపోతే పంజాగుట్ పోలీస్ స్టేషన్ను ముట్టడిస్తామన్నారు.
మేం కొట్టలేదు : సీఐ శోభన్
ఘటనపై పంజాగుట్ట సీఐ శోభన్ వివరణ కోరేందుకు ప్రయత్నించగా అందుబాటులోకి రాలేదు. మెసేజ్ పెట్టగా ‘మేం కొట్టలేదు’ అని రిప్లై ఇచ్చారు.
