- పరిగి ఎమ్మెల్యేరామ్మోహన్ రెడ్డి
హైదరాబాద్, వెలుగు : రాష్ట్ర ప్రభుత్వం ఆరేడు నెలల్లోనే రూ.2 లక్షల రుణమాఫీ కోసం ఒక్కో నియోజకవర్గానికి సగటున రూ.200 కోట్ల నుంచి రూ.300 కోట్ల చొప్పున విడుదల చేసిందని పరిగి ఎమ్మెల్యే రామ్మోహన్ రెడ్డి అన్నారు. శనివారం అసెంబ్లీలో రైతు భరోసాపై ఆయన మాట్లాడారు. గత బీఆర్ఎస్ ప్రభుత్వం రుణమాఫీ చేస్తే వడ్డీలకే సరిపోయాయని, రైతుల ఖాతాలు ఎన్పీఏలోకి వెళ్లాయని తెలిపారు. తెలంగాణ భూభారతి చట్టం తీసుకువచ్చి సీఎం రేవంత్ రెడ్డి ధరణి కష్టాలను తీరుస్తున్నారని చెప్పారు.
ఆరు గ్యారంటీలను అమలు చేస్తున్నామన్నారు. లగచర్ల ఇష్యూలోనూ బీఆర్ఎస్ నేతలు కావాలని తప్పుడు ప్రచారం చేస్తున్నారన్నారు. సోషల్ మీడియా టీంను అడ్డం పెట్టుకుని ప్రజలకు అవాస్తవాలు చెబుతున్నారని విమర్శించారు. సురేష్ అనే ఒక వ్యక్తికి డబ్బులు ఇచ్చి నాటకానికి తెరలేపారని మండిపడ్డారు. ఇక వికారాబాద్ ప్రాంతానికి రూ.15 వేల కోట్లు పెట్టుబడులు తెచ్చి 30 వేల ఉద్యోగాలు కల్పించేందుకు సీఎం రేవంత్ రెడ్డి ప్రయత్నిస్తుంటే, అడ్డుకుంటున్నారన్నారు.
