చట్టసభల్లో రిజర్వేషన్లను ఎస్సీ, ఎస్టీలకు మరో పదేళ్లపాటు పొడిగించారు. ఈ కేటగిరీకింద తమకు కేటాయించిన సీట్లలో పోటీ చేసి లోక్సభ, అసెంబ్లీల్లో అడుగు పెడతారు. అయితే మన దేశంలో పోటీతో నిమిత్తం లేకుండా చట్టసభలోకి ప్రవేశించే కేటగిరీ ఆంగ్లో ఇండియన్లు. వీరిని అసెంబ్లీకి గవర్నర్, లోక్సభకు రాష్ట్రపతి నామినేట్ చేస్తుంటారు. రిజర్వేషన్లను పొడిగిస్తూ చేసిన రాజ్యాంగ సవరణలో ఆంగ్లో ఇండియన్లను చేర్చలేదు. ఎందుకంటే, దేశంలో కేవలం 296 మంది మాత్రమే ఉన్నారని 2011 జనాభా లెక్కలు చెబుతున్నాయి.
బ్రిటిష్ పాలనకు గుర్తుగా మిగిలిపోయిన ఆంగ్లో–ఇండియన్ల కోటాని మోడీ సర్కారు పొడిగించకుండా ప్రస్తుతానికి ఆపి ఉంచింది. రిజర్వేషన్లను పొడిగించడానికి ఉద్దేశించిన ఆర్టికల్ 334ని సవరించడంతో… ఎస్సీ, ఎస్టీ కమ్యూనిటీకి మరో పదేళ్లపాటు చట్టసభల్లో రిజర్వేషన్ అమలు కానుంది. ఇదే తరహాలో పొడిగించాల్సిన ఆంగ్లో ఇండియన్ల విషయాన్ని పట్టించుకోలేదు. దేశంలో 2011 జనాభా లెక్కల ప్రకారం ఆంగ్లో ఇండియన్లు కేవలం 296 మంది మాత్రమే ఉన్నందున, వారికోసం సీట్లను రిజర్వ్ చేయనవసరం లేదని మోడీ సర్కారు భావించింది. అయితే, పూర్తిగా తలుపులు మూసేయలేదు. అవసరమైతే వారికి చట్టసభల్లో రిజర్వేషన్ కల్పించే విషయాన్ని తర్వాత డిస్కస్ చేయవచ్చునని వదిలివేసింది.
మొదటి లోక్సభ ఏర్పడినప్పటి నుంచి ఇప్పటివరకు… దాదాపు 67 ఏళ్లుగా అమల్లో ఉన్న ఈ కోటాని పొడిగించకూడదన్నది ప్రభుత్వం నిర్ణయంగా తెలుస్తోంది. చట్టసభల్లో ఎస్సీ, ఎస్టీ, ఆంగ్లో ఇండియన్ కమ్యూనిటీలకు కల్పిస్తున్న రిజర్వేషన్ గడువు వచ్చే ఏడాది జనవరి 25తో ముగియనుంది. అందువల్ల ఆర్టికల్ 334ని సవరిస్తూ ఎస్సీ, ఎస్టీలకు మాత్రమే పొడిగింపునిచ్చింది. రాజ్యాంగాన్ని రాసిన కానిస్టిట్యూషన్ అసెంబ్లీలో లీడింగ్ లాయర్ ఫ్రాంక్ ఆంథోనీ కూడా ఒక సభ్యుడు. ఆయన తన కమ్యూనిటీకి భద్రత కల్పించాలన్న ఉద్దేశంలో ఆంగ్లో ఇండియన్లకు ప్రత్యేక రిజర్వేషన్ కల్పించే క్లాజ్ని చేర్చారు. ఈ సదుపాయాన్ని పొందిన మొదటి ఎంపీ కూడా ఫ్రాంక్ ఆంథోనీయే. మొదటి లోక్సభ నుంచి 10వ లోక్సభ వరకు మధ్యలో రెండుసార్లు మినహా వరుసగా ఆంథోనీ నామినేట్ అయ్యారు. స్వాతంత్ర్యానికి ముందు సెంట్రల్ లెజిస్లేటివ్ అసెంబ్లీలో ‘ఆంగ్లో ఇండియన్లు/ప్రత్యేక ప్రయోజనాలు’ అనే కేటగిరీ ఒకటుండేది. దానిద్వారా హెన్రీ గిడ్నీ అనే ఆంగ్లో ఇండియన్ 1920 నుంచి 1934 వరకు అయిదుసార్లు నామినేట్ అయ్యారు.
ఫ్రాంక్ ఆంథోనీ ప్రతిపాదన ప్రకారం లోక్సభ ఎన్నికల్లోగానీ, లేదా అసెంబ్లీ ఎన్నికల్లోగానీ ఆంగ్లో ఇండియన్ ఎవరూ నెగ్గని పక్షంలో రాష్ట్రపతి లేదా గవర్నర్ నామినేట్ చేస్తారు. ఆ ప్రకారంగా ఆర్టికల్ 331 ప్రకారం లోక్సభలో ఇద్దరు, ఆర్టికల్ 333 ప్రకారం అసెంబ్లీలో ఒకరు నామినేట్ అవుతున్నారు. ప్రస్తుత లోక్సభలో ఆంగ్లో ఇండియన్లు ఎవరినీ నామినేట్ చేయలేదు. దేశంలోని 28 రాష్ట్రాలు, చట్టసభలున్న 3 యూటీలు ఉన్నాగానీ; తెలంగాణ, ఏపీ సహా 14 రాష్ట్రాల్లో మాత్రమే ఆంగ్లో ఇండియన్లను నామినేట్ చేస్తున్నారు. తెలంగాణ ఏర్పడ్డాక రెండు అసెంబ్లీల్లోనూ ఎల్విస్ స్టీఫెన్సన్ నామినేట్ అయ్యారు. ఆంధ్రప్రదేశ్ అసెంబ్లీలో ఫిలిప్స్ సి.టోచర్ 2016లో నామినేటయ్యారు. ప్రస్తుతం అక్కడ ఎవరినీ భర్తీ చేయలేదు.
కాగా, మోడీ సర్కారు చెబుతున్న జనాభా లెక్కని తృణమూల్ ఎంపీ డెరెక్ ఓబ్రియన్ తోసిపుచ్చుతున్నారు. ఆయన తండ్రి నీల్ ఓబ్రియన్ 1996లో లోక్సభకు ఇదే కోటాలో నామినేట్ అయ్యారు. ఆంగ్లో ఇండియన్ అనే పదానికి మూలం ఈస్టిండియా కంపెనీ పాలన దగ్గర ఉంది. అప్పట్లో ఇంగ్లీషు తెలిసిన అడ్మినిస్ట్రేషన్, అకౌంట్స్ డిపార్టుమెంట్లకు చెందినవాళ్లు భారతీయుల్లో లేరు. బ్రిటన్ నుంచి అధికారులను, సిబ్బందిని, సైన్యాన్ని తెచ్చుకున్నారు. 1850 నాటికి 40 వేల మంది బ్రిటిష్ సైనికులు, 2,000 మంది ఆఫీసర్లు ఉండేవారు. రైల్వే లైన్లు వేయడం, లోకోమోటివ్లను నడపడం, సిగ్నలింగ్ వ్యవస్థను కంట్రోల్ చేయడం వంటి టెక్నికల్ ఇంజినీరింగ్ పనుల్లో ఆరితేరిన బ్రిటన్ ఇంజినీర్లు ఇండియాలో పనిచేశారు. వాళ్లు స్థానిక మహిళలను పెళ్లాడి ఇక్కడే సెటిలైపోయారు. అలాంటివాళ్లను ప్రత్యేకించి చూడాల్సిన బాధ్యత అప్పటి బ్రిటిష్ గవర్నమెంట్పై పడింది. ఫ్రెంచ్, ఫోర్చుగీస్, డచ్ తదితర దేశాల అధికారులు, సైనికులు ఇండియన్ మహిళలను పెళ్లాడినా వాళ్ల సంతానానికి ఎలాంటి హోదా దక్కలేదు.
మొదట్లో ఆంగ్లో ఇండియన్ అనే పదాన్ని ఇండియాలో నివసిస్తున్న లేదా పనిచేస్తున్న బ్రిటిషర్లకు వాడేవారు. ఉదాహరణకు, ప్రముఖ రచయిత రడ్యార్డ్ క్లిప్పింగ్ని ఆంగ్లో ఇండియన్గా వ్యవహరిస్తారు. ఆయన తల్లి స్కాట్లాండ్కి, తండ్రి బ్రిటన్కి చెందినవారు. ఇలాంటివాళ్లను క్రమంగా తండ్రి బ్రిటిష్ జాతీయుడు, తల్లి ఇండియన్ లేదా బ్రిటన్ తల్లి, ఇండియన్ తండ్రి అయినవాళ్లనుద్దేశించి అనడం మొదలైంది. ఈస్టిండియా పాలన ముగిసిపోయి, బ్రిటన్ ఏలుబడిలోకి వెళ్లే సమయానికి పెద్ద సంఖ్యలో మిగిలారు. భారత స్వతంత్ర పోరాటంలో వీళ్లంతా సహజంగానే బ్రిటన్ వైపు నిలబడ్డారు. తల్లి వారసత్వం రీత్యా ఇండియాకి, తండ్రి వారసత్వం రీత్యా బ్రిటన్కి చెందినవాళ్లు కావడంతో ఎటూ తేల్చుకోనివాళ్లుకూడా ఉండేవారు. వాళ్ల సంతానం ఎక్కువగా రైల్వేలో చేరిపోయింది. ఈ కన్ఫ్యూజన్పై ‘భవానీ జంక్షన్’ అనే నవల రాస్తే, దానిని సినిమాగా కూడా తీశారు. స్వాతంత్ర్యం వచ్చాక చాలామంది ఆంగ్లో ఇండియన్లు బ్రిటన్కు, ఆస్ట్రేలియా, కెనడాలకు వెళ్లిపోయారు.
ఎక్కువ మంది టీచర్లే
ఆంగ్లో ఇండియన్స్ లో ఎక్కువమంది టీచర్లుగానే ఉన్నారు. ఇంగ్లీష్ బాగా మాట్లాడగలరేమో, ఆ సబ్జెక్టే ఎక్కువగా చెప్తారు. అట్లాగే, పియానో, వయొలిన్, గిటార్ లాంటివి నేర్పడం చాలామందికి ప్రొఫెషన్. చర్చిసర్వీసులో కొందరుంటారు. మరికొంతమంది నర్సింగ్ సేవల్లో కనిపిస్తారు. జెనరేషన్ మారాక, ఇప్పుడు ఎక్కువమంది మ్యూజిక్ ఇండస్ట్రీ వైపు మళ్ళారు, సింగర్స్గా కొందరు, ఇన్స్ట్రుమెంట్స్ వాయిస్తూ కొందరు బతుకుబండి నడిపేస్తున్నారు.
ఆంగ్లో ఇండియన్లలో ప్రముఖులు
రడ్యార్డ్ క్లిప్పింగ్ : నూట పాతికేళ్లుగా పిల్లలను ఆకట్టుకుంటున్న ‘జంగిల్ బుక్’ ఆయన రాసిందే. తరాలు మారుతున్నా ఎప్పటికప్పుడు కొత్త తర పిల్లలు ‘మోగ్లీ’ పాత్రను తమలో చూసుకుంటున్నారు. నిజానికి క్లిప్పింగ్ తల్లిదండ్రులెవరికీ ఇండియన్ వారసత్వం లేదు. కానీ, 19వ శతాబ్దంలో ఇండియాలో పనిచేయడానికి వచ్చిన బ్రిటిషర్లను ఆంగ్లో ఇండియన్’ కేటగిరీలో పరిగణించేవారు.
డయానా హేడెన్ : మాజీ ప్రపంచ సుందరి డయానా హేడెన్ సికిందరాబాద్కి చెందిన ఆంగ్లో ఇండియన్. ఆమె 1997లో మిస్ వరల్డ్గా నెగ్గారు.
రోజర్ బిన్నీ : ఫస్ట్ వరల్డ్ కప్ సాధించిన ఇండియన్ టీమ్లో ఒకరు. ఆల్రౌండర్గా జట్టులో కొనసాగినా, కుడి చేతి మీడియం ఫాస్ట్ బౌలర్గానే మంచి గుర్తింపు పొందారు. 1983 వరల్డ్ కప్లో 18 వికెట్లు తీసి హయ్యెస్ట్ వికెట్లు పడగొట్టిన ఘనత సాధించారు.
ఆండ్రియా జెరెమియా : నాగచైతన్య, తమన్నా నటించిన ‘తడాఖా’ సినిమాలో ఆండ్రియాకూడా నటించింది. సంగీతం, సాహిత్యం, పాటలు పాడడం ఆమెకు చాలా ఇష్టం. హారిస్ జైరాజ్, అనిరుధ్ రవిచందర్, తమన్, దేవీశ్రీ ప్రసాద్ వంటి టాప్ మ్యూజీషియన్ల దగ్గర అనేక పాటలు పాడింది.
రాష్ట్రాలవారీగా ఆంగ్లో ఇండియన్లు
కేరళ 124
తమిళనాడు 69
ఆంధ్రప్రదేశ్ 62
మహారాష్ట్ర 16
కర్ణాటక 9
పశ్చిమ బెంగాల్ 9
ఒడిశా 4
చత్తీస్గఢ్ 3
మొత్తం 296
ఆ నాలుగు రాష్ట్రాల్లో ఎందుకు నామినేట్ చేశారు?
దేశం మొత్తం మీద ఆంగ్లో–ఇండియన్లు 296 మంది మాత్రమే ఉన్నారని ఇప్పుడు చెబుతున్నారు. యూపీ, ఉత్తరాఖండ్, జార్ఖండ్, మధ్యప్రదేశ్లలో అయితే మా వాళ్లు ఒక్కరూ లేరంటున్నారు. అలాంటప్పుడు ఈ నాలుగు రాష్ట్రాల్లో గడచిన మూడేళ్లలో నలుగురు ఆంగ్లో–ఇండియన్ ఎమ్మెల్యేలను ఎందుకు నామినేట్ చేశారు?. ఈ తెలివి అప్పుడేమైందో బీజేపీ నాయకులు సమాధానం చెప్పాలి.
– డెరెక్ ఓబ్రియెన్, ఎంపీ (తృణమూల్ కాంగ్రెస్ పార్టీ)
జంగా ఎంత మంది ఉన్నారో ఎవరికీ తెలియదు
2011 సెన్సస్ ప్రకారం పశ్చిమబెంగాల్లో ఆంగ్లో–ఇండియన్లు 9 మంది ఉన్నారు. మా ఫ్యామిలీలోనే అంతకన్నా ఎక్కువ మంది ఉన్నారు. ఓ పిటిషన్పై ఇప్పటికే 750 మంది ఆంగ్లో–ఇండియన్లు సంతకాలు చేశారు. నిజానికి ఈ దేశంలో మేం కరెక్ట్గా ఎంత మంది ఉన్నామో ఎవరికీ తెలియదు. మా అంచనా ప్రకారం ఆంగ్లో–ఇండియన్లు లక్షల సంఖ్యలో ఉంటారు.
– బ్యారీ ఓబ్రియెన్, ప్రెసిడెంట్ ఇన్ చీఫ్, ఏఐఏఐ అసోసియేషన్
