మునుగోడులో ఆన్లైన్ ట్రాన్స్ఫర్ చేసేందుకు రెడీ అవుతున్న పార్టీలు

ఈ విషయంలో ఒక అడుగు ముందే ఉన్న టీఆర్ఎస్
ఓటర్ల ఫోన్ నంబర్లతో పాటే బ్యాంక్ఖాతా నంబర్ల సేకరణ
ప్రచారం పేరుతో వివరాలు రాబడుతున్న వార్డు ఇన్చార్జిలు
పోలింగ్కు ముందు రోజు పేమెంట్ చేసేలా ప్లాన్

నల్గొండ, వెలుగు: మునుగోడు ఉప ఎన్నికలో ఓటర్లను ప్రలోభాలకు గురిచేసే కార్యక్రమం మొదలైంది. నిన్న మొన్నటివరకు మండల, గ్రామస్థాయి లీడర్లకు పైసలు వెదజల్లి వలసలను ప్రోత్సహించిన అధికార, ప్రతిపక్ష పార్టీలు ఇప్పుడు ఓటర్ల పై ఫోకస్పెట్టాయి. హుజూరాబాద్ ఉప ఎన్నికల్లో ఓటర్లకు నేరుగా డబ్బులు పంచి అభాసుపాలుకావడంతో ఇప్పుడు రూట్ మార్చాయి. ఓటర్లందరికీ అకౌంట్లు, చాలామందికి స్మార్ట్ఫోన్లు ఉండడంతో సడీ సప్పుడు కాకుండా ఆన్లైన్పేమెంట్చేసేందుకు రెడీ అవుతున్నాయి. ఈ విషయంలో రూలింగ్పార్టీ లీడర్లు ముందంజలో ఉన్నారు. ఇంటింటి ప్రచారం పేరుతో ఓ వైపు పాంప్లెంట్స్ పంచుతూనే మరోవైపు ఓటర్ల వివరాలు, ఫోన్నంబర్లు, బ్యాంక్ అకౌంట్డిటెయిల్స్ సేకరిస్తున్నారు.

డైరెక్ట్గా అకౌంట్లలోకే..

మునుగోడు ఎన్నికలను అన్ని ప్రధాన పార్టీలు సీరియస్గా తీసుకున్నాయి. ముఖ్యంగా టీఆర్ఎస్పేరును బీఆర్ఎస్గా మార్చి జాతీయ రాజకీయాల్లో చక్రం తిప్పాలనుకుంటున్న రూలింగ్పార్టీకి మునుగోడు గెలుపు కీలకంగా మారింది. హుజూరాబాద్ ఎన్నికను కూడా ప్రతిష్టాత్మకంగా తీసుకున్న టీఆర్ఎస్, అక్కడ వివిధ పథకాల పేరుతో రూ.5వేల కోట్ల దాకా ఖర్చు పెట్టింది. తీరా పోలింగ్ముందు అధికార, అపోజిషన్ పార్టీ లీడర్లు ఓటుకు రూ.3వేల నుంచి రూ.6వేల దాకా పంచి, రెడ్హ్యాండెడ్గా దొరికిపోయారు. చాలా చోట్ల డబ్బులు అందని ఓటర్లు రోడ్డుపైకి వచ్చి ఆందోళనకు దిగారు. ఈ దృశ్యాలు జాతీయస్థాయి మీడియాలోనూ ప్రముఖంగా రావడంతో చూసినవాళ్లంతా ముక్కునవేలేసుకున్నారు. అంతకుముందు హుజూర్నగర్, సాగర్ ఎన్నికల్లో కొందరు ఓటర్లకు ఫోన్పే, గుగూల్ పే ద్వారా డబ్బులు ట్రాన్స్ ఫర్ చేశారనే ఆరోపణలు వచ్చాయి. కానీ ఈసారి మునుగోడులో పూర్తిస్థాయిలోఅకౌంట్ చెల్లింపులు చేయాలని పార్టీలు భావిస్తున్నట్లు చెప్తున్నారు. ఈ విషయంలో రూలింగ్పార్టీ ఇప్పటికే అకౌంట్నంబర్లు, ఫోన్ నంబర్లు సేకరిస్తోంది. పోలింగ్ ఒకటి, రెండు రోజుల ముందు ఆయా గ్రామాలు, వార్డులకు చెందిన పార్టీ లీడర్ల ద్వారా ఓటర్ల అకౌంట్లకు ట్రాన్స్ఫర్ చేసే అవకాశం కనిపిస్తోంది. కాగా, ఓటుకు ఎంత ఇవ్వాలనేది ఆయా ఏరియాల్లో ఉన్న పోటీని బట్టి, ప్రత్యర్థి ఇచ్చే మొత్తాన్ని బట్టి నిర్ణయిస్తారని ఓ లీడర్చెప్పడం గమనార్హం.

అన్ని డిటెయిల్స్ రాబడ్తున్నరు..

రూలింగ్ పార్టీకి చెందిన వార్డు ఇన్చార్జిలు దసరా తర్వాత గ్రామాల్లో ఇంటింటి ప్రచారం స్పీడప్ చేశారు. చేతిలో పాంప్లెంట్స్తో ఒక్కో ఇంటికి ఇద్దరు నుంచి ముగ్గురు వెళ్లి టీఆర్ఎస్కు ఓటెయ్యాలని చెప్తూనే పనిలో పనిగా ఓటర్లకు సంబంధించిన అన్ని వివరాలు సేకరిస్తున్నారు. ఇంట్లో ఉన్న మొత్తం ఓటర్లు, వాళ్ల పేర్లు, ఫోన్నంబర్లు, బ్యాంక్ అకౌంట్డిటెయిల్స్ అడుగుతున్నారు. పేర్లు, ఫోన్నంబర్లు సరేగానీ, అకౌంట్ డిటెయిల్స్ ఎందుకు అడుగుతున్నారో తెలియక ఓటర్లు పరేషాన్ అవుతున్నారు. కొందరైతే మీరు గవర్నమెంటోళ్లు కాదు కదా, పార్టీవోళ్లకు ఇవన్నీ ఎందుకు? అని అడిగితే పోలింగ్ ముందు మీకే తెలుస్తది అంటూ తప్పించుకుంటున్నారు. పైసలు వేస్తామని ఇప్పుడే చెప్తే విషయం లీకై, ప్రత్యర్థి పార్టీలు, ఎలక్షన్ ఆఫీసర్ల నుంచి తలనొప్పి ఉంటుందనే దాటవేస్తున్నట్లు తెలుస్తోంది. కాగా, ఫోన్నంబర్లు, అకౌంట్ డిటెయిల్స్తో పాటు ఆయా ఓటర్లు ఏ పార్టీకి ఓటేసే అవకాశముందో కూడా వార్డు ఇన్చార్జిలు తెలుసుకుంటున్నారు. ఇందుకోసం అక్కడి లోకల్ పార్టీ లీడర్లపై ఆధారపడ్తున్నారు. ప్రస్తుతం ఒక్కో వార్డు ఇన్చార్జి పరిధిలో 100 మంది ఓటర్లు ఉండగా, ఆ 100 మందిలో టీఆర్ఎస్కు, బీజేపీకి, కాంగ్రెస్కు, ఇతర పార్టీలకు ఎన్ని ఓట్లు పడ్తాయో, న్యూట్రల్గా ఉండేవాళ్లెందరో వివరాలు సేకరించి, ఎంపీటీసీ స్థానాలకు ఇన్చార్జిలుగా ఉన్న ఎమ్మెల్యేలు, మంత్రులకు పంపిస్తున్నారు. ఈ లిస్టుల ద్వారా తమకు పడబోయే ఓట్లపై ఎమ్మెల్యేలు, మంత్రులు ఓ అంచనాకు వచ్చి, ఆ సంఖ్యను పెంచేందుకు ఏం చేయాలో వ్యూహం రచిస్తున్నారు.