కోరుట్ల, వెలుగు: కోరుట్లలో దొరల పాలనను అంతం చేయడానికే వచ్చానని నిజామాబాద్ ఎంపీ , కోరుట్ల బీజేపీ అభ్యర్థి ధర్మపురి అర్వింద్అన్నారు. శుక్రవారం జగిత్యాల జిల్లా కోరుట్లలో అర్వింద్ నామినేషన్ వేశారు. ఈ కార్యక్రమానికి బీజేపీ ఎమ్మెల్యే ఈటల రాజేందర్ హాజరయ్యారు. అర్వింద్ మాట్లాడుతూ బీఆర్ఎస్, కాంగ్రెస్ అభ్యర్థులు ఒక్కటేననీ, సీఎం కేసీఆర్ఇద్దరికీ డబ్బులు పంపిస్తున్నాడని ఆరోపించారు. చిట్టాపూర్‌‌లో ఫ్యాక్టరీ కోసం గుంజుకున్న భూములను తిరిగి అప్పగిస్తామని, పసుపు బోర్డు హామీ నెరవేర్చానని, మూతపడ్డ చక్కెర ఫ్యాక్టరీ తెరిపిస్తామని హామీ ఇచ్చారు. ఎన్నికలయ్యాక డబుల్బెడ్రూం ఇండ్లు కట్టిస్తానని, వ్యవసాయ ఆధారిత ఫ్యాక్టరీలను ఏర్పాటు చేసి స్థానిక యువతకు ఉద్యోగాలు కల్పిస్తామన్నారు. గల్ఫ్ కార్మికుల సంక్షేమానికి ఎన్ఆర్ఐ సెల్, మంత్రిత్వశాఖ ఏర్పాటు చేసేందుకు కృషి చేస్తానన్నారు.
ఆవాస్ యోజన కింద తెలంగాణలో మొదటి దశలో 15 లక్షలు ఇండ్లు కట్టిస్తామన్నారు. బీజేపీ కార్యకర్తలపై పెట్టిన దొంగ కేసులు ఎత్తేసి, పోలీసుల సంగతి చూస్తామని హెచ్చరించారు. బీడీ కార్మికులకు స్పెషాలిటీ హాస్పిటల్ ఏర్పాటు చేస్తామని, రోడ్లు, డ్రైనేజీలు నిర్మిస్తామన్నారు. పద్మశాలీ సంఘం జిల్లా అధ్యక్షుడు రుద్ర శ్రీనివాస్, కౌన్సిలర్ రుద్ర సుజాతతో పాటు పలువురు పార్టీలో చేరగా కండువా కప్పి ఆహ్వానించారు. కొత్త బస్టాండ్ నుంచి నంది చౌరస్తా వరకు భారీ ర్యాలీ తీశారు. అంతకు ముందు ఎంపీ అర్వింద్ దంపతులు సంకల్ప విఘ్నేశ్వరాలయంలో పూజలు చేసి ఆర్డీవో ఆఫీస్లో నామినేషన్ వేశారు. జగిత్యాల, బాల్కొండ అభ్యర్థులు బోగ శ్రావణి, అన్నపూర్ణమ్మ, లీడర్లు సురభి నవీన్, సుఖేందర్గౌడ్, సునీత, రఘు, రాజశేఖర్, నరేశ్ పాల్గొన్నారు.
