- బీఆర్ఎస్, కేసీఆర్, కేటీఆర్,హరీశ్రావు అండగా ఉంటరు
- మీటింగ్లో కేటీఆర్తోని కూడా మాట్లాడినా
- కలెక్టర్పై దాడికి రెండు రోజుల ముందు రోటిబండ తాండాలో ‘పట్నం’ వ్యాఖ్యలు
- సోషల్ మీడియాలో వీడియో వైరల్
కొడంగల్, వెలుగు: ఫార్మా పరిశ్రమ భూసేకరణ కోసం ఎవరొచ్చినా తరిమికొడదామని, బీఆర్ఎస్పార్టీతోపాటు కేసీఆర్, కేటీఆర్, హరీశ్ రావు అండగా ఉంటారని కొడంగల్ మాజీ ఎమ్మెల్యే పట్నం నరేందర్రెడ్డి వ్యాఖ్యానించారు. వికారాబాద్ కలెక్టర్పై దాడికి రెండు రోజుల ముందు రోటిబండ తండాలో ఆయన రైతులను రెచ్చగొట్టేలా వ్యాఖ్యలు చేశారు. ఇందుకు సంబంధించిన ఓ వీడియో సోషల్ మీడియాలో వైరల్గా మారింది.
ఈ నెల 11న కలెక్టర్ప్రతీక్ జైన్పై దాడి జరగ్గా.. గత నెల 27వ తేదీనే వికారాబాద్ జిల్లా దుద్యాల మండలంలోని రోటిబండ తండాలో పట్నం నరేంద్రెడ్డి ఈ వ్యాఖ్య లు చేసినట్టు తెలిసింది. అక్టోబర్25న దుద్యాల మండలంలోని లగచర్లలో అధికారులు అభిప్రాయ సేకరణకు వెళ్లారు. అదే టైంలో లగచర్లకు చెందిన దుద్యాల మండల కాంగ్రెస్ పార్టీ ప్రెసిడెంట్ శేఖర్వెళ్తుండగా.. రోటిబండ తండావాసులు ఆయనను బంధించారు. ఈ సందర్భంగా పోలీసులు లాఠీచార్జి చేశారు.
దీంతో 27వ తేదీన తండావాసులను పరామర్శించడానికి రోటిబండతాండాకు పట్నం నరేందర్రెడ్డి వచ్చారు. అక్కడ ఏర్పాటు చేసిన సమావేశంలో మాట్లాడారు. ‘‘గ్రామానికి కాంగ్రెస్నాయకులు, సీఎం, కలెక్టర్.. ఎవ్వరొచ్చినా తరిమికొడ్దాం. బీఆర్ఎస్ పార్టీ మనకు అండగా ఉంటది. కేసీఆర్, కేటీఆర్, హరీశ్ రావు కూడా అండగా ఉంటరు. నిన్ననే కేటీఆర్తోని మీటింగ్ పెట్టి మాట్లా డినా’’ అంటూ పట్నం నరేందర్ రెడ్డి ప్రసంగాన్ని కొనసాగించారు.
ప్రస్తుతం నరేందర్ రెడ్డి కలెక్టర్పై దాడి కేసులో ఏ1గా చర్లపల్లి జైలులో రిమాండ్లో ఉన్నారు. కాగా, వీడియోలో వ్యాఖ్యలను బట్టి కలెక్టర్ ప్రతీక్ జైన్, అడిషనల్కలెక్టర్ లింగ్యా నాయక్, తాండూర్సబ్కలెక్టర్ఉమాశంకర్ ప్రసాద్, కడా స్పెషల్ ఆఫీసర్ వెంకట్రెడ్డి తదితరులపై దాడి చేయాలని 15 రోజుల ముందే ప్లాన్ వేసినట్టు పోలీసులు అనుమానిస్తున్నారు. దీనికి బీఆర్ఎస్ కార్యకర్త భోగమోని సురేశ్, మరికొంత మందిని ఎంచుకుని ప్లాన్ ఇంప్లిమెంట్ చేసినట్టు విచారణలో వెల్లడైంది. భూసేకరణలో భూమి పోనివారే అధికారులపై దాడికి పాల్పడడం చూస్తుంటే పట్నం, మరికొందరు ముఖ్య లీడర్ల ప్లాన్ ప్రకారమే ఇదంతా జరిగినట్టు పోలీసులు భావిస్తున్నారు.
