ఏపీ డిప్యూటీ సీఎంగా బిజీగా ఉంటూనే మరోవైపు ఆయన కమిట్ అయిన సినిమాలను పూర్తి చేస్తున్నారు పవన్ కళ్యాణ్. ముందుగా ఆయన నుంచి రాబోతున్న చిత్రం ‘హరిహర వీరమల్లు’. ప్రస్తుతం శరవేగంగా షూటింగ్ జరుగుతోంది. రెండు భాగాలుగా రూపొందుతోన్న ఈ మూవీ ఫస్ట్ పార్ట్ షూటింగ్ తుది దశకు చేరుకుందని ప్రకటించారు మేకర్స్.
గురువారంతో హైదరాబాద్‌‌‌‌లోని అల్యూమినియం ఫ్యాక్టరీలో క్లైమాక్స్ షూట్ పూర్తయిందని, డిసెంబర్ మొదటి వారంలో ఫైనల్ షెడ్యూల్‌‌‌‌ను విజయవాడలో స్టార్ట్ చేస్తున్నట్టు తెలియజేశారు.
ఈ షెడ్యూల్‌‌‌‌లో అత్యంత కీలకమైన భారీ సన్నివేశాలను చిత్రీకరించబోతున్నారు. ఇందులో పవన్ కళ్యాణ్‌‌‌‌తో పాటు, 200 మంది ఆర్టిస్టులు పాల్గొనబోతున్నారు. ఈ షెడ్యూల్‌‌‌‌తో షూటింగ్ మొత్తం పూర్తి కానుంది. దర్శకుడు జ్యోతికృష్ణ రూపొందిస్తున్న ఈ చిత్రంలో చారిత్రాత్మక యోధుడి పాత్రలో పవన్ కనిపించనున్నారు. నిధి అగర్వాల్ హీరోయిన్‌‌‌‌గా నటిస్తుంది. బాబీ డియోల్ కీలక పాత్ర పోషిస్తుండగా, అనుపమ్ ఖేర్, నాజర్, రఘుబాబు ముఖ్య పాత్రల్లో నటిస్తున్నారు.
ఏఎం రత్నం సమర్పణలో ఎ దయాకర్ రావు ఈ చిత్రాన్ని నిర్మిస్తున్నారు. ఎంఎం కీరవాణి సంగీతం అందిస్తున్నారు. ‘హరి హర వీర మల్లు పార్ట్-1 స్వార్డ్ వర్సెస్ స్పిరిట్’గా మార్చి 28న తెలుగు, తమిళ, కన్నడ, మలయాళ, హిందీ భాషల్లో వరల్డ్‌‌‌‌వైడ్‌‌‌‌గా విడుదల కానుంది.
