టాలీవుడ్ ప్రముఖ స్టార్ హీరో పవర్ స్టార్ పవన్ కళ్యాణ్ ప్రస్తుతం ఒక పక్క రాజకీయాలు, మరోపక్క సినిమాలు అంటూ బిజిబిజీగా గడుపుతున్నాడు. కాగా పవన్ కళ్యాణ్ ఇటీవలే కూటమి ప్రభుత్వం సూపర్ సిక్స్ లో భాగంగా గ్యాస్ సిలెండర్ల పంపిణీ పథకం ప్రారంభించారు. ఈ క్రమంలో ఏలూరు జిల్లాలో ఏర్పాటు చేసిన బహిరంగ సభలో పాల్గొని ప్రసంగించారు.
అయితే పవన్ మాట్లాడుతున్న సమయంలో కొందరు ఓజీ.. ఓజీ అంటూ నినాదాలు చేశారు. దీంతో పవన్ ఈ విషయం గురించి మాట్లాడుతూ సినిమా పేర్లు కాకుండా భగవన్నామస్మరణ చేస్తే కచ్చితంగా అద్భుతాలు జరుగుతాయని అభిమానులకి సూచించాడు. సినిమాలు కేవలం సరదా, ఉత్సాహం కోసం మాత్రమేనని కానీ అంతకంటే ముందు పని చేయడం ముఖ్యమని అభిప్రాయం వ్యక్తం చేశాడు.
ఈ విషయం ఇలా ఉండగా పవన్ గతంలో సంతకం చేసిన సినిమాలను మాత్రమే కంప్లీట్ చేసేందుకు దర్శక నిర్మాతలకి డేట్లు ఇస్తున్నాడు. అలాగే రాజకీయాల్లో బిజీగా ఉండటంతో కొత్త సినిమాలలో నటించేందుకు ఆసక్తి చూపడం లేదు. కాగా ప్రస్తుతం పవన్ సుజిత్ డైరెక్ట్ చేస్తున్న ఓజి, ప్రముఖ సినీ నిర్మాత ఏ.ఎమ్ రత్నం నిర్మిస్తున్న హరిహర వీరమల్లు సినిమాల్లో హీరోగా నటిస్తున్నాడు. ఇప్పటికే ఈ సినిమాలు దాదాపుగా షూటింగ్ పూర్తి చేసుకున్నాయి.
