ఓవైపు ఏపీ పాలిటిక్స్‌‌తో బిజీగా ఉంటూనే మరోవైపు ఆయన కమిట్ అయిన సినిమాలను పూర్తి చేస్తున్నారు పవన్ కళ్యాణ్. ముందుగా ఆయన నుంచి రాబోతున్న చిత్రం ‘హరిహర వీరమల్లు’. ఇటీవల విజయవాడలో తిరిగి మొదలైన షూటింగ్ శరవేగంగా జరుగుతోంది. మార్చి 28న సినిమా విడుదల చేయనున్నట్టు ఇప్పటికే ప్రకటించారు. కానీ ఈ సినిమా రిలీజ్ విషయంలో కొన్ని రూమర్స్ సోషల్ మీడియాలో వైరల్ అవుతున్నాయి. అనుకున్న తేదీకి మూవీ రిలీజ్ కాదంటూ ప్రచారం జరుగుతోంది. అయితే ఇవన్నీ పుకార్లేనని, ఎవరూ నమ్మొద్దంటూ మూవీ టీమ్ క్లారిటీ ఇచ్చింది.
రెండు భాగాలుగా తెరకెక్కుతోన్న ఈ చిత్రాన్ని ‘హరి హర వీర మల్లు పార్ట్-1 స్వార్డ్ వర్సెస్ స్పిరిట్’గా మార్చి 28న తెలుగు, తమిళ, కన్నడ, మలయాళ, హిందీ భాషల్లో వరల్డ్‌‌వైడ్‌‌గా విడుదల చేయడం ఖాయమని మరోసారి ప్రకటించారు. దర్శకుడు జ్యోతికృష్ణ రూపొందిస్తున్న ఈ చిత్రంలో చారిత్రాత్మక యోధుడి పాత్రలో పవన్ కనిపించనున్నారు. నిధి అగర్వాల్ హీరోయిన్‌‌గా నటిస్తుండగా, బాబీ డియోల్, అనుపమ్ ఖేర్ కీలక పాత్రలు పోషిస్తున్నారు. ఏఎం రత్నం సమర్పణలో ఎ దయాకర్ రావు ఈ చిత్రాన్ని నిర్మిస్తున్నారు. ఎంఎం కీరవాణి సంగీతం అందిస్తున్నారు.
