ఆదిలాబాద్ టౌన్, వెలుగు: తెలంగాణ రైతులను నిలువునా మోసం చేసిన కేసీఆర్ ప్రభుత్వానికి వారి ఉసురు తగులుతుందని బీజేపీ ఆదిలాబాద్ జిల్లా అధ్యక్షుడు పాయల్ శంకర్అన్నారు. శనివారం ఆదిలాబాద్ మండలంలోని రామాయి, రాంపూర్ గ్రామాల్లో సోయా పంట నష్టపోయిన రైతుల పొలాలను ఆయన పరిశీలించారు.
రాష్ట్ర ప్రభుత్వం ఫసల్ బీమా అమలు చేయనందుకే రైతులు నష్టపోయారని, రైతులకు ఇచ్చిన మాట ప్రకారం పంట రుణమాఫీ సైతం చేయకుండా మోసం చేసిందని ఆగ్రహం వ్యక్తం చేశారు. ఈ ఏడాది సోయా రైతులకు దిగుబడి లేక పెట్టుబడి సైతం రాలేని దుస్థితి నెలకొందన్నారు. ఫసల్ బీమా యోజన అమలు చేయాలని రాష్ట్ర ప్రభుత్వానికి ఎన్నిసార్లు విన్నవించినా పట్టించుకోలేదన్నారు.
ఇప్పటికైనా రైతులు, నిరుద్యోగులు, ఉద్యోగులు, ప్రజలు కేసీఆర్కు తగిన గుణపాఠం చెప్పాలని పిలుపునిచ్చారు. నాయకులు సుభాష్, మహేందర్, ముకుందరావు, సురేశ్, విశాల్, జ్ఞానేశ్వర్ తదితరులు పాల్గొన్నారు.
