- కులగణన తర్వాతే స్థానిక ఎన్నికలు: పీసీసీ చీఫ్ మహేశ్ గౌడ్
- రాష్ట్ర ఆర్థిక వ్యవస్థను బీఆర్ఎస్ విచ్ఛిన్నం చేసింది
- సోషల్ మీడియాలో గులాబీ దండు సెన్స్లెస్ ప్రచారం
- పదేండ్లలో బీఆర్ఎస్ ఇచ్చింది 30 వేల కొలువులే
- పది నెలల్లో తాము 50 వేల జాబ్స్ ఇచ్చామని వెల్లడి
నిజామాబాద్, వెలుగు: త్వరలోనే రాష్ట్ర కేబినెట్ విస్తరణ ఉంటుందని పీసీసీ చీఫ్ మహేశ్కుమార్గౌడ్ వెల్లడించారు. హర్యానా, జమ్మూకాశ్మీర్ ఎన్నికల కారణంగా హైకమాండ్ బిజీగా ఉండడంతో కేబినెట్ విస్తరణ వాయిదా పడుతూ వచ్చిందని ఆయన తెలిపారు. కులగణన తర్వాతే లోకల్బాడీ ఎన్నికలకు వెళ్లాలనే కృతనిశ్చయంతో ఉన్నామని చెప్పారు. సోమవారం నిజామాబాద్ డీసీసీ ఆఫీస్లో మీడియాతో మహేశ్గౌడ్ మాట్లాడారు. కాంగ్రెస్ ఎమ్మెల్యేలు గెలిచిన అసెంబ్లీ సెగ్మెంట్లలో పార్టీ ఇన్చార్జ్గా వారే వ్యవహరిస్తారని, ఓడిన సెగ్మెంట్లలో అభ్యర్థులకు ఇన్చార్జ్ బాధ్యతలు అప్పగించామని చెప్పారు. ఇతర పార్టీల నుంచి గెలిచి కాంగ్రెస్లో చేరిన ఎమ్మెల్యేలతో కొన్ని చోట్ల కొత్త, పాత సమస్య వస్తున్నదని.. దానిని పరిష్కరిస్తామన్నారు. అంతిమంగా కార్యకర్తలకు నష్టం కలుగకుండా చూడడం తమ బాధ్యత అని ఆయన చెప్పారు.
అబద్ధాల ప్రచారంలో బీఆర్ఎస్
బీఆర్ఎస్ పదేండ్ల పాలనలో రాష్ట్రాన్ని ఆర్థికంగా విచ్ఛిన్నం చేశారని, ఆ ఆర్థిక పరిస్థితిని చక్కదిద్దేందుకు తమ ప్రభుత్వం కృషి చేస్తున్నదని పీసీసీ చీఫ్ మహేశ్ గౌడ్ అన్నారు. ప్రజలకిచ్చిన ప్రతి హామీని నిలబెట్టుకుంటూ ముందుసాగుతున్నామని తెలిపారు. ‘‘బీఆర్ఎస్ పార్టీ దుకాణం బందైందన్న ఆందోళనతో సోషల్ మీడియాను ఆ పార్టీ సెన్స్లేకుండా వాడుకుంటూ అబద్ధాలు ప్రచారం చేస్తున్నది. నీళ్లు, నిధులు, నియామకాల కోసమే నాడు సోనియాగాంధీ నేతృత్వంలోని యూపీఏ సర్కార్ తెలంగాణ రాష్ట్రాన్ని ఇచ్చింది. పదేండ్ల బీఆర్ఎస్ గవర్నమెంట్ 30 వేల జాబ్స్ మాత్రమే ఇవ్వగా.. కాంగ్రెస్ ప్రభుత్వం ఏర్పడిన పది నెలల్లో 50 వేల మంది యువతకు ఉద్యోగాలు ఇచ్చింది” అని ఆయన పేర్కొన్నారు. రైతు రుణ మాఫీ విషయంలో అపోహలను వ్యాప్తి చేసేందుకు బీఆర్ఎస్ నేతలు శతవిధాలా ప్రయత్నిస్తున్నారని, గతంలో రైతులను మోసం చేసిన అనుభవంతో వాళ్లు కామెంట్లు చేస్తున్నారని మండిపడ్డారు. ‘‘సోషల్ మీడియాలో బీఆర్ఎస్ చేసే విష ప్రచారంతో ఆ పార్టీ నేతలు తాత్కాలిక ఆనందం పొందుతున్నారు. వారిని ప్రజలు నమ్మరు. సోషల్ మీడియాలో చేసే బీఆర్ఎస్ తప్పుడు ప్రచారాలు సక్సెస్ కాకపోవడంతో ఆ పార్టీ నేతలు ఫ్రస్ట్రేషన్కు లోనవుతున్నారు. ఈ విషయంలో బీజేపీ కూడా తక్కువేమీ కాదు” అని ఆయన విమర్శించారు.
నిజామాబాద్కు మరో మెడికల్ కాలేజీ అవసరం
దసరా కానుకగా నిజామాబాద్కు యంగ్ ఇండియా ఇంటిగ్రేటెడ్ స్కూల్ మంజూరైందని పీసీసీ చీఫ్ మహేశ్గౌడ్ తెలిపారు. జిల్లాకు మరో మెడికల్ కాలేజీ అవసరమని అభిప్రాయపడ్డారు. పారిశ్రామికంగా నిజామాబాద్ జిల్లాను డెవలప్ చేయడానికి సీఎం రేవంత్రెడ్డితో చర్చిస్తానని.. ప్రాణహిత 20, 21 ప్యాకేజీ పనులు పూర్తి చేయిస్తానని తెలిపారు. ఆర్వోబీ నిర్మాణాలను కేంద్ర ప్రభుత్వం నిర్లక్ష్యం చేస్తున్నదని, ఈ విషయంలో నిజామాబాద్ ఎంపీ అర్వింద్ చొరవ తీసుకోవాలని ఆయన అన్నారు. ‘‘ఎన్నికల తర్వాత రాజకీయాలు వద్దు. అందరం కలిసి రాష్ట్రాభివృద్ధికి సంకల్పం తీసుకుందాం. నిజామాబాద్ను స్మార్ట్ సిటీ కోసం ఎంపిక చేయాలి” అని కోరారు. కార్యక్రమంలో నిజామాబాద్ రూరల్ ఎమ్మెల్యే డాక్టర్ భూపతిరెడ్డి, ఉర్దూ అకాడమీ చైర్మన్ తాహెర్ తదితరులు పాల్గొన్నారు.
