- మిల్లర్లకు కలెక్టర్ వార్నింగ్
నాగర్కర్నూల్, వెలుగు: ఎఫ్సీఐకి సకాలంలో సీఎంఆర్ బియ్యం ఇవ్వని మిల్లులపై పీడీ యాక్ట్ బుక్ చేయాలని కలెక్టర్ ఉదయ్కుమార్ ఆదేశించారు. సీజన్ల వారీగా తీసుకున్న వడ్లకు సీఎంఆర్ బియ్యం ఇవ్వకుండా నిర్లక్ష్యం చేసిన మిల్లులపై చర్యలు తప్పవని హెచ్చరించారు. శనివారం పౌర సరఫరాల శాఖ మంత్రి ఉత్తమ్కుమార్ రెడ్డి రివ్యూ అనంతరం అధికారులు, మిల్లర్లతో రివ్యూ మీటింగ్ నిర్వహించారు.
ఈ సందర్భంగా కలెక్టర్ మాట్లడుతూ ప్రభుత్వం సేకరించిన వడ్లు తీసుకున్న రైస్ మిల్లర్లు సకాలంలో సీఎంఆర్ అప్పగించకుండా జాప్యం చేస్తున్నారని మిల్లర్లపై ఆగ్రహం వ్యక్తం చేశారు. సివిల్ సప్లై, రెవెన్యూ, మార్కెటింగ్ శాఖల అధికారులు రైస్ మిల్లులను తనిఖీ చేయాలని ఆదేశించారు. ప్రభుత్వం ఇచ్చిన వడ్ల నిల్వలో ఏ మాత్రం తేడా వచ్చినా మిల్లర్లపై కఠిన చర్యలు తీసుకోవాలన్నారు.
కల్వకుర్తిలోని శ్రీ లక్ష్మీవెంకటనరసింహస్వామి పార్ బాయిల్డ్ రైస్ మిల్ ఇప్పటివరకు ఒక ఏసీకే కూడా బియ్యం ఇవ్వలేదని, మిల్లర్పై కేసు నమోదు చేయాలని ఆదేశించారు. గుడిపల్లిలోని సీతారామాంజనేయ ఇండస్ట్రీస్ 162 ఏసీకేల సీఎంఆర్ పెండింగ్ ఉండడంపై ఆగ్రహం వ్యక్తం చేశారు. ఒకే మిల్లులో 50 శాతం పెండింగ్ ఉండడంతో అసహనం వ్యక్తం చేశారు. జిల్లాలోని 10 రైస్ మిల్లుల వద్ద 324 ఏసీకేల సీఎంఆర్ బియ్యం పెండింగ్ ఉండడమేమిటని ప్రశ్నించారు.
పెండింగ్లో ఉన్న మిల్లుల నుంచి ఇతర మిల్లులకు వడ్లను బదలాయించాలని ఆదేశించారు. 15 రోజుల్లో వంద శాతం సీఎంఆర్ బియ్యం అందజేస్తామని మిల్లర్లు తెలిపారు. అడిషనల్ కలెక్టర్ కె. సీతారామారావు, సివిల్ సప్లై ఆఫీసర్ స్వామి కుమార్, డీఎం బాల్రాజ్ పాల్గొన్నారు.
