- అధికార పార్టీకి అనుకూలంగా ఉన్నోళ్లకే డబుల్ బెడ్రూం ఇళ్లు
- వనపర్తిలో నాటకీయ పరిణామాల మధ్య ఆందోళన విరమణ
పెబ్బేరు, వెలుగు: మున్సిపాలిటీలో రోడ్డు విస్తరణలో భాగంగా అధికారులు ఇళ్లను కూల్చివేస్తున్నారని, నష్టపరిహారం ఇచ్చాకే తమ ఇళ్ల జోలికి రావాలని వనపర్తి జిల్లా పెబ్బేరు పట్టణంలో బాధితులు డిమాండ్ చేశారు. ఇక్కడ రోడ్డు విస్తరణ పనులపై రోజుకో వివాదం తలెత్తుతున్నది. ఇప్పటి వరకు కూలగొట్టిన ఇళ్లకు నష్టపరిహారం ఇవ్వలేదని, డబుల్ బెడ్రూం ఇల్లు కూడా మంజూరు చేయలేదని బాధితులు ఫైర్ అయ్యారు. దీంతో బుధవారం పోలీస్స్టేషన్ వద్ద జేసీబీతో ఇళ్లు కూల్చేయడానికి వెళ్లగా బాధితులు అడ్డుకున్నారు.
ఒక బాధితుడు పెట్రోల్ పోసుకొని ఆత్మహత్యాయత్నానికి పాల్పడడంతో పరిస్థితి ఉద్రిక్తంగా మారింది. దీంతో అక్కడికి వెళ్లిన మున్సిపల్ కమిషనర్ ఆదిశేషుపై ఆ పెట్రోల్ పడింది. ఎంత సముదాయినంచినా బాధితులు ఆందోళన ఆపలేదు. వెంటనే వనపర్తి ప్రధాన రహదారిపై బైఠాయించి గంట పాటు ధర్నా చేశారు. అదేవిధంగా మంగళవారం జరిగిన డబుల్ బెడ్రూం ఇళ్ల పంపిణీలోనూ అవకతవకలు జరిగాయని బాధితులు వాపోయారు.
బీఆర్ఎస్ పార్టీకి అనుకూలంగా ఉన్న వారికే అధికంగా ఇళ్లు మంజూరు చేశారని, అధికార పార్టీ నేతలు, అధికారులు అంతా కుమ్మక్కై లక్కీ డిప్ తీశారన్నారు. దాంతో చాలా మంది అర్హులకు అన్యాయం జరిగిందని ఆవేదన వ్యక్తం చేశారు. రెండు గంటల పాటు జరిగిన కొన్ని నాటకీయ పరిణామాల అనంతరం మున్సిపల్ వైస్ చైర్మన్ కర్రె స్వామి, పోలీసులు జోక్యం చేసుకొని వారితో ధర్నా విరమింపజేశారు.
